Shillong, Nailar 01 : U Myntri Rangbahduh ka Ri, u Narendra Modi ha ka sngi U Blei u la ai ka jingiaroh ia ka Meghalaya kaba la snohkti ban pynphuh ia ka jingrakhe Azaadi Ka Amrit Mahotsav nalor ba u kynmaw kyrpang ruh ia ka mynsiem riewshlur jong u khlawait ka Jaidbynriew, u Tirot Sing, ha ka jingkren paidbah jong u kaba 91 ba tip kum ka Mann Ki Baat.
Shuh shuh la pynpaw ruh ia ka jingkmen halor ka jingiaid jong ka Amrit Mahotsav kaba long kum ka jingsnohkti lang jong ki paidbah ha baroh kawei ka ri. Da kaba iaroh ruh ia ki nongshong shnong kiba la pdiang ia ka Mahotsav ban rakhe ia ka jingdap 75 snem ka ri naduh ba ka ioh ia ka jinglaitluid, u Myntri Rangbahduh ka Ri u la ong, “Kum kine ki jingjia ki la jia ruh ha Meghalaya dang shen mynta u snem. Ki paidbah ki kynmaw ruh ia u khlawait ka Meghalaya – u Tirot Sing, ha ka lyngkhuh sngi iap jong u. U Tirot Sing u la iakhun dohiap ia ki dohlieh kiba thmu ban kurup bad batbor ia ka rilum Khasi bad pynjot thiaw ia ka kolshor hangne. Bun ki nongshim bynta ki la pyni ia ka sap jong ki ha kane ka prokram. Kine baroh ki pynkhie im biang ia kaei kaba la jia mynnor. Ka la don ruh ka jinglehkmen kum shi bynta jong kane prokram, ha kaba ia ka kolshor ba kyrpang jong ka Meghalaya ruh la pynrung lang ha ka rukom kaba ishongkun bha.”
U Myntri Rangbah u la ai ruh ka burom ia u Shaheed Udham Singh bad baroh kiba la don bynta lang bad ha ka jingiakhun bad aiti ia laka jong ka jingim na ka bynta ka Ri. “Paralok, ha ka 31tarik, Naitung, baroh ki nongshong shnong ka Ri ngi kynmaw burom bad ai burom ia ka jinglen lade jong u Shaheed Udham Singh,” u la ong.
Katei ka jingkren jong u ha kane ka sngi U Blei ka long shi bynta ka jingrakhe iaka lyngkhuh sngi laitluid ka Ri. Kumta u la ong, “Ngi baroh ngin sakhi ia kane ka sngi khraw… lada dei ba la kha ia ngi ha ka por ba dang don ka jingtan mraw, ngim tip shuh kumno ngin long mynta? Ka jingthrang ban laitluid na ka jinglong mraw, ka jingthrang ban laitluid na ka jingshah teh ha kiwei pat ki bor. Ha kito ki por ngi iohi man ka sngi, ngi iohi da ki million ngut ki nongshong shnong ka Ri kiba iakhun thma bad aiti la ka jong ka jingim na bynta ka jinglatiluid ka ri.”
“Kane ka ‘Mann Ki Baat’ kadei kaba kyrpang bha, ka daw ka long ba mynta kadei ka lyngkhuh ioh jinglaitluid ka Ri kaba dei ruh ka jingiaid lynti kaba 75snem ba ka ri ka ioh ia ka jinglaitluid,” bynrap biang u Myntri Rangbahduh ka Ri.
