Shillong, Naitung 18 : U Myntri Khynnah ka sorkar pdeng ba peit ia ka Cooperation, Krishan Pal Gurjar u la iaroh ia ka jingtreikam jong ka East Khasi Hills District bad kyntu ia ki ophisar ba kin iai bteng ban pyndonkam katba lah ia ka Look Northeast Policy jong ka sorkar India.
Ha ka jingwan iuhkjat ba arngut ha jylla, u Gurjar u la leit ban jurip ïa ka skhim sam umbam umdih jong ka Mawtawar (Mawtawar Water Supply Scheme) kaba dei ka projek bala bynrap lang naka skhim MGNREGS bad ka Tnad PHE.
Ula lum ruh ia ka jingialang bad ka Tnad Planning & Cooperation bad shong bishar kam halor ka jing pyntrei ia ki skhim bapher bapher ka Sorkar Pdeng ba kynthup ia ka – MGNREGS, PMAY-G, JJM, NLM, Computerisation of PACS bad ARCs, PM DeVINE, NESIDS, Mushroom Development Centre bad kiwei kiwei ha East Khasi Hills.
Haba kren sha ki nongthoh khubor, u Gurjar ula iathuh ruh ia ka thong Viksit Bharat @2047 jong u Myntri Rangbah Duh ka ri, kaba pyni ia ka thong ba angnud jong ka Sorkar India ban pynkylla ia ka Ri sha ka Ri kaba la roi ka par.
Ula ban jur halor ka jingpynleit jingmut u PM halor ka roi ka par jong ki Jylla ka thain Shatei Lam Mihngi kum ka jingpynkylla ia ka roi ka par ha kaban kynjoh ia kane ka thong.
U Myntri Khynnah ula ioh iakren ruh bad ki nongioh bynta jong ka skhim MGNREGA, PMAY (G), ki Lakh pati Didi, ki Cooperate Society bad ki Water Warrior.
Ula ban jur ia ka thong jong u PM ba ka roi ka par jong ki briew kan lam sha ka roi ka par jong man ki Jylla, ka ban pynlong pat ia ka Ri kaba la roi shakhmat.
