Nongpoh, Naiwieng 08: Kumba ju long man la u snem, ki nongtrei jong ka National Health Mission (NHM), ka jylla kila pynlong ia ka jingiakynduh lang ha ka sien kaba 4 lane ka 4th Annual General Meeting ia kaba la pynlong hapoh ka St. Paul Parish Hall ha Nongpoh, Ri Bhoi District.
Ka jingthmu jong kane ka jingiakynduh lang kaba shisien shisnem, ka long ban wanrah ia ka jingithuh ithaw para nongtrei hapoh ka NHM, ban iatai halor ki mat jingtrei ne ki jingeh jong ki para dkhot bad ruh ban wanrah ia ka jingiatylli hapdeng ki para nongtrei.
Ha kane ka jingialang la wan ban iadonlang u MLA ka Nongpoh, u Bah Mayralborn Syiem, u Secretary ka Health and Family Welfare bad Mission Director jong ka NHM u Ram Kunar, ki President bad ki General Secretary nalor ki dkhot ki kynhun NHM na kylleng ki district ka jylla Meghalaya.
Haba kren ha ka jingialang, u Mayralborn Syiem u la pynpaw ia ka jingsngewkmen ban ioh ia donlang bad baroh ki nongtrei ka NHM da kaba ai jingiaroh ruh ia ka jingiatylli ka jongki bad ruh halor ka jingtreishitom ban ai ka jingshakri kaba khlem da shongthait na bynta ki kam jong ka Koit ka Khiah lyngba ka NHM.
U la kdew ruh, halor ka jinglen lade jong ki nongtrei ka NHM ha ka por ba wan lynshop ka khlam COVID-19, da kaba ai khublei ia ka jingshlur jong ki ban ai ka jingshakri kaba khlem jingtieng jingsmiej ha kitei ki por bad ruh halor ka jingnang kiew bad jingiaid shaphrang jong ka tnad ka Koit ka Khiah na ka jingiadon bynta lang da ki nongtrei ka National Health Mission.
Katba u Ram Kumar ula pynpaw ia ka jingkmen ban sakhi ba sa shisien, ki nongtrei ka NHM ki long kiba iatylli mlon hapoh ka jylla hi baroh kawei da kaba pynpaw ruh ba ka long kaba donkam shisha ia ka jingïatreilang bad ula kyntu ia baroh ban bteng ban trei shitom na bynta ka jingbha jong ka koit ka khiah ha Meghalaya.
Kum u heh ka NHM ula pynpaw ruh, ba ka NHM ka don shibun ki thong ban pynurlong ban kyntiew ia ka tnad ka Koit ka Khiah ha ka jylla ban pynmyntoi ia ki paidbah nongshong shnong, kumta da ka jingiashimbynta lang jong baroh yn lah ban pynurlong ia ki thong jong ka NHM, na bynta ka jingshakri ba kham bha ha ka koit ka khiah ha kylleng ki shnong kiba don ha ka jylla.
Lyngba kane ka jingialang la plie paidbah ruh ia ka online web portal kaba kyrpang na bynta ki nongtrei jong ka NHM, kaba dei ka jingkylla ba khraw ha ka lad ka la jong ki kam digital bad jingmyntoi ia ki nongtrei, ha kaban yn sdang ruh ia ka jingregister lyngba ka online registration, na bynta ban pynsuk ia ki kam bahkhlieh halor ka jingtrei.
