Shillong Rymphang 18: U MLA ka NPP na Umsning Constituency Dr Celestine Lyngdoh, ula iaroh ia ka sorkar Meghalaya kaba la shimkhia ban kyntiew ia ka roi ka par bad pynpaw ba kala don ka jingkiew jong ka ioh ka kot ka jylla bad ka jingbit jingbiang ha ki liang bapher bapher.
“Ka Meghalaya kala wan baar hadien jong ka Tamil Nadu ha kaba iadei bad ki kam pynroi ne Development Index bad ka jingroi ha ka ioh ka kot, ngi long kawei na ki jylla kaba la sted ha kaban kiew ka roi hapoh ka ri India” ong u Dr Lyngdoh haba iashimbynta ha ka jingiatai halor ka Governor’s Address hapoh ka iingdorbar thawain hynne ka sngi Balang.
Ula pynpaw ia ka jingroi jongka ioh ka kot jong ka jylla da kaba ong ba ka ioh ka kot kala kiew ar shah na ka T.29,508 Klur ha u snem 2018 sha ka T.59,626 Klur ha u 2025.
U Dr Lyngdoh ula kdew ruh ia ki jingkynshew tyngka ka sorkar ha ki bynta bapher bapher ha kaba kala don ka jingkiew kynthup ia ka pule puthi, ki surok, ka bording bad ki jingtei ha ki jaka sor.
“Ka sorkar kala iaid shisha shakhmat ha kaban wanrah ia ki jingkylla ha ka jingim jong ki paitbah. Ha u snem 2023, nga la kob ia ka sorkar ban pynbiang ia ka Artificial Turf ha ka madan ialehaki Football ha Nongpoh bad happoh jong ka 3 bnai la buh ia u mawnongrim” ong u Bah Lyngdoh.
Ula banjur ba ka jingpynleit jingmut ka sorkar ha ki kam pynroi kala wanrah ia ka jingbit jingbiang ha ki thain nongkyndong, kynthup ia ka jingshna ia ki surok, ka jingkiew jong ka jingdon ki Self-Help Group bad ki Producer Group.
“Ka jingdon ki Self-Help Group kala kiew na ka 5,800 ha u snem 2018 sha ka 51,674 ha u 2025,” la ong u Bah Lyngdoh.
U Dr Lyngdoh ula iaroh ruh ia ka jingshimkhia u Myntri Rangbah da kaba ong, ba udei u nongialam uba kloi ban iaid ryngkat bad ka trei ia ka kam bad ula shimkhia ia ki mat kiba la mad jingeh da ki paitbah jong ka Umsning. “La pyndep ia ka jingbuh ia ki Street Light ha Umsning bad ka jingmad jingeh na ka jingkyrduh um ruh la lah ban pynbeit ha ki katto katne” ula ong.
Ula ai jingmut ia ka sorkar ba kadei ban leh da kaba tyngeh ia kito kiba trei torti ia ki kam bad ong, ba kane ka pynjot noh ia ka jingkmen jong ka jingioh ia ka surok kaba thymmai”.
Ula ai jingmut ba ka sorkar kadei ban buh rekod ia kum kitei ki kontraktor bad ban pyntip sha ka Sorkar Pdeng ba kan kiar ia ki ha kaban ioh bun ia ki kam ki jam.
