Shillong, Iaiong 16 : U MLA ka BJP na South Shillong Bah Sanbor Shullai ula iaroh ia ka jingpyrshang jong ka Sorkar ban pynbun ia ka jingpass ki khynnah ha ka eksam SSLC bad ainam ia u Myntri Rangbah ka Jylla namar ka CM Impact Guidebook.
U Bah Sanbor ula ong ba kum kine ki sienjam kila iarap bha ia ki khynnah pule kiba wan na ki longiing ba dun aka jingioh, ki bym lah satia ban leit khreh kot sha ki riew shimet ne ki jaka ai jinghikai.
U Bah Sanbor ula pynksan ruh da kaba ong ba bun ki khynnah kiba duna ha ka jingpule kila ioh jingmyntoi bha na kane ka CM Impact Guidebook ba kin lah pynkhreh bha bad ban pass ia ki eksam jong ki.
Ula ong ba ka jingkiew ha ka jingpass bha ki khynnah ka dei namar ka sienjam bala shim da u CM bad ka kyrmen ba da kine ki lynti bala shim, ka literacy rate (jingdon ki nongshongshnong ba nang ban thoh bad pule) kan sa kiew bad ka Jylla ka lah ban kynjoh ia ka thong ba 100 % ha ka jingdon ki nongshongshnong ba nang ban thoh bad pule.
U Bah Sanbor ula ong ba ki khynnah pule kiba duna ka jingstad jingshemphang wat ban pass ia ka eksam ka dei ka jingjop kaba khraw ia ki bad kine mynta kila lah ban aplai ia ka kam Grade-D ha ki kam ba lait ka Sorkar Jylla ne Sorkar Pdeng kynthup ka kam Pulit bad ki bor pahara ka Sorkar Pdeng kaba donkam ia kiba la pass klas 10.
Une u MLA ka BJP ula ong ba ka Sorkar MDA hapoh ka jingialam u Myntri Rangbah Conrad K Sangma kala leh bha bad ula iaroh ia ki jingpyrshang jong ka Sorkar ban wanrah ia ki kam pynroi bapher bapher ha ki kam jngohkai bad kiwei kiwei.
