Shillong, Nailur 23: U State Working President ka NPP Meghalaya bad Myntri Sorkar Marcuise N Marak u la iaroh ia u Myntri Rangbah ka Jylla Conrad K Sangma halor ka jinglah jong u ban pynbiang tarajur ha ka jingmihkhmat ki MLA haka thup Myntri Sorkar bad da kaba burom iaki paralok ba donlang haka Sorkar synroplang-ka Meghalaya Democratic Alliance (MDA).
Haba kren sha ki lad pathai khubor u Marcuise ula ong ba watla ka NPP ka don 33 ngut ki MLA hynrei u Myntri Rangbah u la bat ia ka jingkular jong u ban pynthikna ia ka jingiohmihkhmat lang da ki MLA naki sengsain pyrthei ba don lang haka Sorkar ha ka Kynhun Myntri kum ka Hill State People’s Democratic Party (HSPDP) bad ka United Democratic Party (UDP).
“Da kaba buh ia kane ha ka jingmut, nga lah ban ong ba hooid kane ka jingbhah Myntri Sorkar ka long kaba biang tam” la ong u Marcuise daka ba bynrap “Baroh ki tip ba ka Sorkar synroplang ka donkam ban iai bteng ban pyniadei. Da kaba pyrkhat ia kata, watla ka la don khyndiat eh ki jingsngewdiaw hynrei mynta baroh ki la biang lut”.
U Marcuise ula ong ba kane kan nang iarap ban pynroi ïa ka mynsiem ïatreilang bad ka jingïatreilang hapdeng ki paralok ba don lang haka Sorkar MDA.
U Myntri u la pyntip ruh ba u Myntri Rangbah ka Jylla u la bthah ïa baroh ki MLA na ki seng sain pyrthei ba don lang haka MDA kin shim ïa ka jinglong trai iala ki Constituency da kaba treikam kum ki Myntri Rangbah hala ki jong ki jaka ban kiew ka roi ka par.
“Namarkata, kam mih ka jingkylli ba ka don ka jingbym hun mynsiem namar ba u dang lah ban peit ia ka Constituency jong u da ka jingkitkhlieh kaba pura. Ngi burom ia ki, ia kano kano kaba ki kyrpad kumta kam mih ka jingkylli ba don ka jingbymsuk mynsiem” ula ong.
Haba ia dei bad ka jingmihkhmat ha ka thup kynhun Myntri Sorkar, u nongialam ka NPP u la kdew ba u Myntri Rangbah ka jylla u la shim ia ka rai haba pyrkhat ia ka jingdon ki MLA na Ri Bhoi district. “Da ka jingdon jong ki 4 ngut ki MLA na ka District, u Myntri Rangbah ka Jylla u la pynthikna ba un sngap ia ka sur jong ki bad ban pynbiang ia ki jingdonkam jong ki” ula ong.
.){kind=link}