Shillong, Nailur 26: U Lat ka jylla u C.H.Vijayashankar hynne ka sngi Palei, ula iaroh ia ka jingtrei shitom jong ka Shillong Law College ha kaban saindur ia ka pyrkhat pyrdain bad ban noh synniang ha ka bynta ka kam bishar bad ka kam ain haka jylla Meghalaya.
Haba kren ha ka jingrakhe ia ka Diamond Jubilee jongka college, u Lat ka jylla ula ai khublei ia ka Shillong Law College halor ka jingkynjoh donburom ia ka 60 snem ha ka jingiaid lynti ban pynang pynstad ha kaba iadei bad kain ka kanun.
Haba pdiang ia ki jingeh bad ki jingiar jong ka aiñ ha kane ka juk kaba mynta, ula kyntu ia ki samla pule ban bat ia ki nongrim jong ka hok, ka jingiaryngkat lang bad ka jinglong ba janai ha ki kam kaba ki trei nangne shakhmat.
Ha kane ka sngi la donlang ruh ki symbud kongsan kiba kynthup ia ki nongbishar jong ka Meghalaya High Court u Justice H.S Thankhiew, Justice Wanlora Diengdoh bad Justice B.Bhattacharrjee.
U Lat ula pynshlur ia ka College ba kan bteng ia ka jingkitkhlieh ban kyntiew ia ka jingnang jingstad, ka akor bad ban pynmih ia ki riew shemphang kiba tbit ha ka liang ka ain kiban lah ban synniang da kaba don jingmut sha ka imlang sahlang.
Ula banjur ruh halor ka jingshisha ba ki briew kiba pule aiñ kim ju shongthait bad ki bteng ban shakri ïa ka ri bad ia ka imlang sahlang ha shi lynter ka jingim ka jongki.
Ha kane ka jingïalang la sakhi ruh ïa ka jingdon jong ki riewpawkhmat ha ka liang ka aiñ ka kanun, ki samla pule barim jong ka college, ki nonghikai, ki samla pule bad ki kynrem ki lyndan na kylleng ka jylla.
Ha kane ka jingrakhe la pynlong ruh ia ki jingrwai bad jingshad tynrai bad la pyni ruh iaka histori bad ia ka jingjop jong ka College ha ka jingiaid lynti ka jongka.
