Itanagar, Nailur 26: Ka ïingbishar POSCO ka Jylla Arunachal Pradesh, hynne ka sngi Balang, ka la hukum da ka rai pyniap ia u Warden jong ka Hostel halor ka jingdonkti ban jrong kti khlem rain ïa ki 21 ngut ki khynnah skul ha kawei ka Residential School ba la pynïaid da ka Sorkar ka ba don ha Shi-Yomi district.
Ia une u Warden la tip kyrteng da u Yumken Bagra.
La iathuh ba u Ymken Bagra (33 snem) u la leh khlemrain ïa 21 ngut ki khynnah, kynthup ïa 15 ngut ki khynnah kynthei bad 6 ngut ki shynrang, kiba don hapdeng ka rta 6 bad 15 snem, hapdeng u snem 2019 bad 2022.
Ka iingbishar ka la rai ruh ban pynshitom da kaba set along haduh 20 snem ia 2 ngut kiwei pat ki nongpyniaid skul barim kata u Singtung Yorpen bad ka Marbom Ngomdir halor ka jingdonkti jong ki ha katei ka case katkum ka ain Protection of Children from Sexual Offences (Pocso) Act bad Indian Penal Code (IPC).
Uwei u heh Pulit u la ba kane ka kam bymman ha katei ka skul ba la pyniaid da ka Sorkar, ka la paw pyrthei hadien ba 2 ngut ki khynnah skul kynthei kiba dei shipara, ki la pyntip sha ki kmie ki kpa shaphang katei ka kam runar ha u bnai Naiwieng 2022.
Ha ka 4 tarik u Naiwieng 2022,ki Kmie Kpa ki la ujor daka ejahar ha thanat pulit Monigong kaba hap ha Shi-Yomi district.
U Yumkeng Bagra u uba dei u trai shnong na ka shnong Tadin hajan Aalo ha West Siang District, u la phet rieh bad ki Pulit ki la kem ïa u ha ka 13 tarik Nohprah 2022 na Itanagar.
La thung daka kynhun tohkit ba kyrpang Special Investigation Team (SIT) bad hadien ka jingtohkit ki la lap ba u Bagra u la leh beijot ia 21 ngut ki khynnah ha ka por ba u long kum u Hostel Warden ha ka Karo Government Residential school.
