Shillong, K’lyngkot 25 : U Myntri Rangbah ka Jylla Conrad K Sangma ula ai khublei ia u Bah Hally War jong ka shnong Siej, East Khasi Hills, uba la ioh pdiang ia ka khusnam Padma Shri 2026 namar ka jingsynniang ba radbah jong u ha ki kam imlang sahlang bad jingpynneh pynsah ia ka mariang khamtam ha ka jingpynneh pynsah ia ka jingstad tynrai jong ki Khasi lyngba ka Jingkieng Diengjri.
“Da ki phew snem, ula aiti iala ka jingim ban sumar bad shna ia ki Jingkieng Diengjri, bad long u nongkit khubor (Ambassador) ba shisha jong ki pateng jong ngi, ka riti dustur bad ka jingim ban sumar ia ka mariang” ong u Conrad ha ka rynsan social media hynne ka sngi U Blei.
U Bah Hally, uba sdang ban thain ia kine ki jingtei ha ka rta ba 10, ula shim ia ka bynta kaba kongsan ban pynneh pynsah ia ka rukom leh tynrai kaba pyniahap bad ka mariang, ka jingstad bad ka jingstad ka imlang sahlang. Ki kam jong u kila pynkhlain ia ka jingiadei hapoh ka imlang sahlang bad kyntiew ia ki kam jngohkai kiba iai neh.
“Nga kynmaw iedi ia ka jingiakynduh ia u Bah Hally ha Siej ha ka por ba nga leit sha ki jingkieng tynrai ba im, ha kaba nga la tip ba u la sdang ban shna ia kine ki jingtei kiba phylla ha ka rta kaba dang shiphew snem. Ka jingtip kaba jylliew jong u, ka jingburom kaba jylliew ia ka mariang, bad ka mynsiem ban peit lem ia ka imlang sahlang ka pynlong ia u kum u nongioh burom uba dei hok ban ioh, Bah Hally” ong u Myntri Rangbah.
