Nongpoh, Risaw 01 : U Myntri Rangbah ka Jylla Conrad K Sangma, ula ai ka jingiaroh ia ka Balang Katholik, kata naduh ki missionary, ki phadar, brother, sister lem bad kiwei kiwei, kiba la ialeh shitom ban kyntiew ia ka pule puthi ym tang ha ka Jylla hynrei ha ka thain Shatei Lam Mihngi bad ka Ri baroh kawei.
U Conrad ula pynpaw ia kane haba iashimbynta ha ka jingialang pynhap pyrda ia ka jingrakhe Jubili ksiar jong ka skul Litter Flower Higher Secondary School, kaba don ha ka shnong Mawbri, hynne ka sngi Balang.
Ia ka skul Little Flower Higher Secondary School, la seng ha u snem 1975, daka jingthmu ban pynsaphriang ia ka jingnang jingstad ha ka thain bad ha kine ki 50 snem jong ka jngiaid lynti, ka la kylla long kum kawei na ki shlem ai jinghikai ba paw ha Ri Bhoi Mihngi kaba la pynmih ruh shibun ki samla kiba la lah ban pyndep ha ki jingpule ha ki kyrdan bapher bapher.
Ha kane ka sngi, u Conrad K. Sangma, u la pynbna ruh ba un ai T. 25 lak sha katei ka skul lyngba ka Chief Minister Special Development Fund (CMSDF) naka bynta ba kan tei ïaka building kaba bit ba biang, kaban pynsuk ia ki khynnah kiba leit pule ha katei ka skul.
u Myntri Rangbah u la ai khublei ïa ka skul kaba la pyndep ïa ki san phew snem jong ka jingshakri haka pule puthi bad u la ai khublei ïa ki jingnoh synñiang jong ki nongpynïaid, ki nonghikai, ki khynnah skul barim, bad ka Balang Katholik ha kaba pynwan dur ïa ki pateng jong ki khynnah skul jong ka thaiñ bad ka Jylla baroh kawei.
U Conrad ula ong ba ka jingbei tyngka ka Sorkar ha ki jingtei skul, ki jingai jingiarap sha ki skul shimet, bad ki jingpyrshang ban pynkhlain ia ka jingkyrshan ia ki nonghikai kadei naka bynta ban kyntiew iaka pule puthi haka Jylla baroh kawei.
Naka liang u MLA ka Umroi constituency u Bah Damanbait Lamare haka jingkren u la ai ka jingïaroh ïa kane ka skul halor ka jingnoh synniang jong ka ha ka pule puthi bad ka kolshor jong ka Ri Bhoi bad u la ai mynsiem ruh ïa ki khynnah skul bad ki nonghikai ba kin ïai bteng kyntiew iaka pule puthi.
Ha ka sngi rakhe iaka Golden Jubilee jong ka Little Flower Higher Secondary School, Mawbri Ri-bhoi District, la pule ruh iaka Memorandum of Understanding (MoU) ha kaba la batai ba ka skul ka thmu ban pyniar ia ki jingtei, ban pynrung ia ki jait jingpule Science, Commerce, bad Arts, bad ban ai ia ki jinghikai ba iadei bad ka jingpule bad ki jinghikai kiba iadei bad ka jinglehkai.
Ka MoU ka la pan jingkyrshan na u Myntri Rangbah ka Jylla na ka bynta ka jingïarap pisa ban pynurlong ïa ka projek tei thymmai.
Hashuwa kane la don ruh ki jingpyni ïa ka kolshor, ki jingkren na ki khynnah skul barim (Past Pupil), ka jingai khublei ïa ki nonghikai ba la shongthait bad ki khynnah skul kiba la leh bha, ka jingpyllait ïa ka jingkynmaw jong ka skul, bad ka jingpynlait paidbah ïa ka kot ba la thoh da ka Dr. Mistilia Dkhar.
La pynkut ïa kane ka jingrakhe da kaba pynhiar ïa ka Lama Jubilee bad ka jingrwai jong ka skul bad la pynwai daka jingai khublei na ka Headmistress, Rev. Sr. Anyiele Richa, bad ka jingplie ïa ki kamra klas ba la pynbha bad pynitynnad.
