Shillong, Nailar 21: U Bah Sanbor Shullai uba dei u MLA ka BJP uba dei ruh u Chairman ka MDTC u la ai ka jingiaroh ia ka sorkar MDA hapoh ka jingialam u Conrad K Sangma uba la wanrah ki kam pynroi ban kyntiew ïa ka kam jngohkai pyrthei, kaba la rah bha ia ka jylla ia kaba kiwei ki Sorkar ba mynshuwa kim lah satia.
Katkum ka kyrwoh khubor, u Bah Sanbor Shullai u la ong ka Shillong mynta kala dei kawei na ki jaka ba ki paidbah ki phai khmat bha mynta kum kawei na ki jaka jngohkai pyrthei.Ki projek jong ka tnad jngohkai pyrthei kin sdang ban sei soh na ka jingtrei shitom kine ki khyndiat snem ban wan.
Shuh shuh u Bah Sanbor Shullai u la ong, “Ka jylla Meghalaya kaba mynshwa kam don ki hotel five star hotel hynrei mynta pat ki wan ki jingthmu bapher bapher kiba kum kine”.
U la pynpaw ba da ki katto katne ki jingthmu ban wanrah ki kam pynroi hapoh ka jylla kan sa lah ban pynmih bun ka pisa tang na ki nongwan jngoh kai pyrthei.U la ong ba kum ka party kaba dei ka bynta jong ka sorkar ngi ruh ngi don ka jingkitkhlieh.
Dang shen haba ai jingkren sha ki karkyata jong ka South Shillong, u Bah Sanbor u la ai jingmut ba ka party ka dei ban poi shaduh ki tynrai. Nalor kata u la ai jingmut ba ki nongialam ka party ki donkam ban bishar bniah ia ka jingma kaba lah ban mih shwa ban kren pyrshah ia ka sorkar ha kaba ka BJP hi ka dei ka bynta jong ka jingiateh lok.
U Bah Shullai u la ong ba lada don kano kano ka jingbym sngewhun ngi dei ban iakren bad ka sorkar ban ia kaba leit paidbah.
Shuh shuh u Bah Shullai u la pynpaw ba ka party ka don ka lad kaba khraw ban jop katto katne ki seat kiba lah ban long bad ba ka jingthmu ba kongsan ka dei ban pynbun ia ka bhah seat ha ka election ban wan.
