Shillong, Naitung 11: Ka jylla Meghalaya kala sakhi ia ka jingiaid lynti jong ki kam pynroi kaban sah jingkynmaw, ha kaba ka Myntri Pla Tyngka bad Corporate Affairs ka Ri Nirmala Sitharaman, kala buh ia ki mawnongrim bad plie ruh ia ki projek bapher bapher ha ka jylla kiba kot ia ka T.1,087.81 Klur ha ka jingialang jong ka Integrated Public Programme kaba la pynong ha LARITI – International Centre for Performing Arts and Culture.
Haba kren ha ka jingialang, ka Nirmala Sitharaman kala iaroh ia ka jingiaid shaphrang ka roi ka par ha ka jylla Meghalaya hapoh ka jingialam jong u Myntri Rangbah Conrad K. Sangma.
Hala pyntip ba T.5,400 Klur lah dep ban bhah sha ka jylla Meghalaya lyngba ka Special Assistance to State for Capital Investment (SASCI), kala ong, “Nga dap da ka jingkmen ba ka sorkar kala pyndonkam thikna ia katei ka pisa na ka bynta ki jingtei bapher bapher.
Ngan buh ha ka rekod ia ka jingai khublei kyrpang ia ka jingpyrshang jong ka jylla Meghalaya kaba la lah ban pyndonkam pura ia ka pisa. Ki don katto katne ki jylla ki bym shim la lah ban pyndonkam pura ia ka bhah kaba la ai, hynrei hangne ha Meghalaya, kala pyndonkam pura lut ia ka bhah ka jongka”.
Haba pynpaw ia ka jingiai bteng jong ka Sorkar Pdeng ban ai jingkyrshan, ka Nirmala Sitharaman kala ong ba ka sorkar kala peit bha ia ka thain shatei lam mihngi kum ka thain kaba dei ban pynkupbor, ban leh eiei, ban pynkhlain bad ban pynkylla.
Kala pynpaw ruh ha kaba iadei bad ka jingshna ia palat 540 km ka surok ha Meghalaya bad ka jingkiew kaba san shah ha ka jingpynbiang ia u optical fibre naduh u snem 2014. Kala iaroh ia ka jylla halor ka jinglah ban leh bha ha ki scheme kum ka Jal Jeevan Mission, PM Awas Yojana, PM Jeevan Jyoti Bima Yojana, Swachh Bharat Mission bad kiwei kiwei.
Kala ong, “Ka pisa baroh kaba la ai sha ka Meghalaya naduh u snem 2021 haduh mynta ka long T.5,400 Klur” bad ka la pynpaw ia ka jingkmen halor ka rukom treikam ka sorkar Meghalaya ban pyndonkam ia katei ka song tynga”.
Haba kren ha ka jingialang u Myntri Rangbah ka jylla u Conrad K Sangma ula pynpaw ia ka jingsngewnguh ia ka Sorkar Pdeng halor ka jingbteng ban ai jingkyrshan ia ka jylla Meghalaya.
Ula ong, “Ka jingwan jngoh jong ka Myntri Pla Tyngka ka ri ka long kaba kongsan ym tang ha ka jingiashimbynta ha ki prokram hynrei kadei ruh ka lad ban pyniadei bad ki nongshong shnong ka jylla. Ban ioh jingtip mardor ia ka jingeh kaba ngi mad, ban ai ia ka jingbtin lynti bad ia ki lad ban weng ia kine ki jingeh bad kumno ban iaid nangne shakhmat”.
U Conrad K Sangma, ula ban ia ka thong jong ka sorkar ba kan lylla long kawei napdeng ki Top-10 States ha ka ri hapoh u snem 2032. Ula pynpaw ruh ia ka jingthrang jong ka sorkar ban kylla long kaban kynjoh ia ka ioh ka kot kaba USD 10 billion-dollar economy bad hadien 7 snem jong ka jingbteng ban pyniaid ryntih ia ki kam, ka Meghalaya mynta kala jan ban kot sha ka USD 6-billion ha ka ioh ka kot, ryngkat ka jingkiew kaba la jan sha ka 15%, kaba long kaba heh ban ia ka National Average.
Ula pyntip ia ka Myntri ka Pla Tyngka ba ka Meghalaya kala seisoh ha kaban pyntreikam ia kiba bun ki scheme bad project lyngba ka Externally Aided Project (EAP), kaba long kum ka tyllong kaba kongsan jong ka jingbei tyngka ia ki jylla kiba rit. Kine ki sienjam kila ailed ia ka jylla ban pyntreikam ia kiba bun ki kam pynroi bad ki projek kaba la jan kot ia ka T.12,000 Klur, kaba la noh synniang shi katdei iaka roi ka par ha ka jylla baroh kawei.
Ki heh sorkar kila pyllait ruh ia ka PRIME Impact Report, Meghalaya on the Move: Ka jingseisoh ha kine ki 7 snem, ia kaba la pynpaw ia ka jingjop ka jylla ha ka jingai jingsynshar, ki kam kiba thymmai bad ki jingsengkam ha kylleng ki bynta.
Ki projek kiba kongsan kiba la pyllait paidbah ha ka jylla Meghalaya ki kynthup ia ka 75 Digital Libraries ha ki jaka nongkyndong (162 Klur, SASCI) kaba la pyntreikam da ka State Rural Employment Society, kane ka sienjam yn tei ia ki 750 tylli ki Digital Library ha ki jaka nongkyndong ban pyniasoh ia ki samla bad ka National Digital Library bad ban pynshlur ba kin don ia ka jingmlien ban pule.
Ka Redevelopment of Umiam Lake (120.81 Klur, SASCI): Ka projek jongka tnad jngohkai ban pynkylla dur ia ka Pung Umiam sha ka eco-tourism kaba don kyrdan ha ka pyrthei, ia kaba la khmih lynti ba kan khring ia palat 1.27 lak ngut ki nongjngohkai man la ka snem bad ban pynmih 4,000 tylli ki kam.
Ka MICE & Tourism Infrastructure ha Mawkhanu (T.103 Klur, SASCI): ha ka jaka kaba 106 akar, kaban kynthup ia ka Meghalayan Experience Theme Park, ka Amphitheatre bad Festival Zones ban kyntiew ia ka kam jngohkai.
Ka Mawkhanu Football Stadium (T.732 Klur, ba la tyrwa lyngba ka jingbei tyngka ka SASCI): Ka State-of- Art Complex kaban don ruh ia ka Residential Football Academy, da kaba iatreilang bad ka NorthEast United FC, kaban pynskhem ia ka kyrdan ka jylla Meghalaya kum ka nongbah jong ka jaka ialehkai Football hapoh ka ri India.
Ka Working Women’s Hostels (T.132 Klur, SASCI): Kaba shngain, ka jaka sah kaba kot bor ha Shillong (400 jingthiah) bad Jowai, Byrnihat bad Tura (200 jingthiah), kaban ai ka jingkyrshan ia ki kynthei kiba trei.
Ka Office-cum-Residential Complex ka CBIC, New Shillong (T.256.23 Klur): ka jaka treikam kaba katkum kane ka juk kaba mynta ban pynkhlain ia ka rukom treikam jong ka CBIC hapoh ka jylla Meghalaya.
Ka Northeast Regional Campus jongka Indian Institute of Corporate Affairs, Mawkhanu (T.100.95 Klur, PM’s DevINE): Ka jaka kaba kyrpang na ka bynta ka Corporate Governance, ka jingwad bniah ha ka ioh ka kot bad kaj ingai jinghikai ha ka thain shatei lammihngi. Kadei ha ka sien kaba nyngkong ba ka IICA kan don ruh ia ka ophis Shabar jong ka nongbah Delhi.
Kala don ruh ka jingsam ia ki ‘Cheque’ ha katei ka jingialang ia kiba ioh jingmyntoi lyngba ka scheme kum ka PM MUDRA, PM SVANidhi, PMEGP bad NPS Vatsalya, kaba pyni ba ka sorkar ka iengskhem ban ai jingiarap pisa ha ki shnong ki thaw.
Ki nongseng kam lajong kila ioh ia ki ‘cheque’ na ka Myntri Pla Tyngka bad na u Myntri Rangbah ka jylla bad baroh kiba la long kiba la khreh ban sdang bad pyniar ia ka jingsdang kam naduh ka kam rep, shet jingbam, ka jingbuh ia ki Café, Homestay bad kiwei kiwei.
Kum ka jingkyntiew ia ka jingrep khlem pyndonkam dawai, ka Sitharaman kala pyllait paidbah ia 2-metric-ton u sohtrun organic ban phah sha ka LULU Retail, Dubai, hapoh jongka IFAD-kaba kyrshan da ka Megha-LAMP..
