Shillong, Naitung 11: Ka Myntri ka Sorkar Pdeng kaba khmih ia ka Pla Tyngka bad ka Corporate Affairs ka Nirmala Sitharaman kala ai ia ka jingkren kaba la pynsngew myllung ha ka jingleit jngoh ha Umsawli, Shillong ha ka sngi Thohdieng, bad kala ioh mynsiem na ka jingstad bad jingshemphang u Khasi ban don ia ka synshar kaba khuid, ka khaii pateng kaba don jingkitkhlieh bad ka roi ka par kaba iai neh.
Haba kren ha ka jingialang ha ka jingbuh ia u mawnongrim na ka bynta ki projek kiba kongsan, ka Myntri Pla Tyngka kala ong, “Kane ka jingialang ka long kaba shoh jingmut bha” haba iaroh ia ka jinglong ka akor ka burom jong ki jaidbynriew Khasi. Kala ong ba ka jingstad jingshemphang ka thain ka lah ban ai ka jinghikai iaka ri ha ka lynti sha ka kam ka roi ka par.
“Ha kane ka pyrthei kaba mynta, ngi ju peit jngai na ka bynta ki nongmuna jong ka jingroi bad ka jingai jingsynshar. Hynrei hangne ha ka kolshor ka Meghalaya, ngi shem ia ki katto katne ki nongrim kiba khlain kiban btin lynti, kiba kren shaphang ka longbriew manbriew, ka mariang, ka imlang sahlang bad ka jinglong hok” kala ong.
Kala kren shaphang ki 5 tylli ki nongrim jong ki Khasi, kaba la pynsngewtynnad ia baroh ki nongsngap.
Ka Tip Briew Tip Blei: Ka Sitharaman kala ong, ba kane ka jingmut ka buh iaka burom bad akor ki briew ha ka dohnud jong ka jingai jingsynshar. “Ban iohi ia ka jinglongkhuid ha ki bynriew ka pynkynmaw ia ngi ba man la ki policy bad project kidei ban ktah ia ki jingim da kaba don jingmut” kala ong.
Kamai ia ka Hok: Kala banjur ban long kiba leh hok ha ka rukom kamai ha ka jingim, kala ong “Kam kam khaii pateng kam dei tang ba kan long kaba iohnong hynrei kadei ruh ban long kaba hok. Ka jingtreikam kaba hok bad khuid ha ki tnad sorkar”.
Ka Tip Kur Tip Kha: Kala wer ban don ia ka jingbit jingbiang lang hapdeng ka jingiaid ka pyrthei bad ki jinglong tynrai kiba kordor, kala ong “Ki Iew ha ka pyrthei ki donkam ban burom ia ka bor jong ka imlang sahlang. Ka jingiadei bad ka tynrai ka long kaba kongsan”.
Ka Bhalang Ka Imlang: Ka Sitharaman kala ong ba kane ka nongrim ka pyni ia ka jingiohi jngai ka ri India ia ka jingseisoh bad ka ong, “Kano kano ka jingkiew kan ym long kaba don jingmut lada kam kyntiew iano iano ruh”.
Mei-Ramew – Ki Ryngkew Ki Basa: Kala pynpaw ia ka jingshem ka jongka ha ka lynti na Guwahati sha Shillong, kala ong ba ka thain, ka don ia ka mariang kaba itynnad bad ia ka lyer kaba khuid kaba wanrah ia ka jingiadei kaba kyntang bad ka mei mariang. “Kane ka rukom sngew ia ka jingburom dei ban pyntip kumno ngi la tei, kumno ngi thung bad kumno ngi im” kala ong.
Ka Myntri Pla Tyngka kala ong, ba kine ki jinglong kiba kordor kidei kiba la ngam jylliew ha ka kolshor bad ka jinglong tynrai ha ka Meghalaya— kim dei tang kiba don jingmut hynrei kidei kiba kongsan ha kaban pynwandur ia ka pateng ba kan long kaba hok. “Kine kim dei tang ki jinglong ba kordor ki Khasi hynrei kidei ki jinglong kiba kongsan ia baroh ki briew. Namar ki lah ban btin lynti ia baroh kawei ka ri bad ia ka pyrthei” kala ong.
