Shillong, K’Lyngkot 10: Ka Joint Action Committee (JAC) Hima Sohiong hynne ka sngi kala ai jingiaroh iaka Khasi Hills Autonomous District Council (KHADC) bad ia u chief executive member (CEM) halor ka rai bala shim ban wengkam shipor ne Sospon ia u Lyngdoh ka Hima Sohïong u bah Bashemphang Thabah.
Haba kren sha ki lad pathai khubor u chairman ka JAC Hima Sohïong bah Purningstar Shabong ula ong ba ki khun ki hajar ka Sohiong, ki ai khublei kyrpang iaka KHADC bad ia u CEM ba kila sngap iaka jingdawa jong ka JAC kata ban sospon ne wengkam shipor ia u bah Shemphang Thabah halor ka jingbymlah jong u ban wanrah ia ka synshar khaddar ka ba khuid ba suba hapoh ka Hima baroh kawei.
U bah Purningstar ula ong ba ki don shibun ki daw ban pynlong iaka jingdawa wengkam ia u bah Shemphang ba kynthup ka jingbym lah u Lyngdoh ban ai Sanad Rangbah Shnong bad ka jingbym lah ban pynbit pynbiang iaki jinglut jingsep haba iadei bad ka pisa.
“Naka liang ki khun ki hajar ka Hima Sohiong, ka JAC ka ai khublei iaka KHADC bad ia u CEM kiba la shim iaka rai ban pynurlong iaka jingdawa ki paidbah haba iadei bad ka jingwengkam ia u Lyngdoh ka Hima Sohiong u bah Shemphang Thabah” la ong u bah Purningstar.
U bah Purningstar ula iathuh ba hadien ka jingthung ka KHADC da u Administrator, mynta bun ki shnong bad ki rangbah shnong kila ioh Sanad bad ki kam ki jam ruh hapoh ki shnong ki thaw kila iaid beit iaid ryntih lada nujor ha ka por ba dang bat u bah Shemphang kum u Lyngdoh ka Hima.
Ula kyntu iaki seng sain pyrthei ba kidei ban leh Politic iaki ki mat jong ki paidbah bad ki shnong khamtam haba iadei bad ka jingai Sanad iaki Rangbah Shnong namar kumba paw mynta ki don ki Party kiba la pyrshang ban ialam bakla haba iadei bad ka jingioh sanad rangbah shnong.
