Shillong, Lber 24: Ka Federation of Khasi Jaiñtia and Garo People (FKJGP) kala ai khublei ia ka Garo Hills Autonomous District Council’s (GHADC) kaba la shim ia ka rai ban khanglad ia ki bym dei riewlum ban iakhun ia ka elekshon jongka Council bad ong, ba kane kadei ka histori ha kaban iada ia ka jinglongtynrai ki riewlum bad kyntu ruh ia ki artylli ki district council ha ri-lum Khasi bad Jaintia ba kin shim lang ia katei kajuh ka sienjam.
Ha ka kyrwoh kaba la phah hynne ka sngi Baar da u President ka FKJGP u Bah Dundee Cliff Khongsit ula ai khublei ia ki MDC ka GHADC kiba la ai ka jingmynjur lang ia katei ka Resolution.
“Ngi ai khublei kyrpang ia baroh ki MDC jong ka GHADC kiba la iatylli mlon da kawei ka jingthmu ha kaba kila mynjur ne Pass ia ka Resolution ban khanglad ia ki bym dei ki paid riewlum ban iakhun ia ka elekshon, kaba dei ka hok kaba la pynkupbor kyrpang ia ki paid riewlum lyngba ka Sixth Schedule ka riti synshar jong ka Ri India” ula ong.
Ka FKJGP ka pynpaw ruh ia ka jingsngewnguh ia ka Sorkar Meghalaya bad ia u Lat ka jylla u CH Vijayashankar kiba la kloi ban pdiang bad ban ai ka jingmynjur ban pynlong Aiñ ia ki mat jingdawa kiba shnong nongrim bad ka pynpaw ba kane ka jingshim ia ka rai kadei ruh hadien jong ka jingiakhih ki paitbah ha rilum Garo.
“Ka Sorkar Jylla bad u Lat ka Jylla kila kloi ban pdiang bad ai jingmynjur ia ka jingdawa kaba shong nongrim jong ki paid Garo” la ong u Bah Khongsit.
Haba phai sha ka Khasi Hills Autonomous District Council (KHADC) bad ka Jaintia Hills Autonomous District Council (JHADC), ka FKJGP kala kyntu ia ki ba kidei ban shimkhia noh mardor.
“Kane kadei ka ïa bad ka por kaba biang eh ia ka KHADC bad ia ka JHADC ban shim ia kijuh ki sienjam kumba la leh bad lamkhmat da ka GHADC khnang ba kan long ka jingiada ia ki Paid Khasi-Pnar ban lait na ka jingshah knieh ia ka hok jong ka jinglongtrai ia ka khyndew ka shyiap bad ia ka riti ka dustur” la ong u Bah Khongsit.
Ula maham ba ka jingpulom ban pynkhlain ia ki aiñ kan pynlong ia ki paid riewlum ban don ha ka jingma kaba khraw bad ong “Lada ki bym dei ki riewlum ki ioh ban knieh noh ia ka khaïï pateng bad ia u lakam synshar, kala dei lypa ka jingkut jong ka lawei”.
Ka FKJGP ka don ruh ia ka jingkyrmen kaba skhem ba ka sorkar jylla bad u Lat jong ka jylla kin ym leh shilliang khmat ha kaban pynioh ia ka hok jong ki riewlum kaba mar ryngkat ha ka jylla hi baroh kawei bad kala ai khublei ruh ia ka FKJGP Garo Hills Zone, kaba la ialam da u President u Pritam Arengh bad kiwei pat ki kynhun sengbhalang kiba la trei shitom khlem shongthait haduh ban da ioh ia u soh jong ka jingjop bad ula iaroh ruh ia ki paid riewlum na rilum Garo kiba la ai shisha ia ka jingkyrshan kaba radbah.
Ka Federation kala kyntu ia ka KHADC bad JHADC ban pynlong ia ka Dorbar Kyrpang ne Special Session ban pynkylla ia ka Autonomous District Rules, da kaba banjur, “Ki briew kiba nabar kim dei ban iohlad ban mushlia ia ka jinglong kyntang jong ka Ïing Dorbar Thaw Aiñ ha ki Autonomous District Council”.
 kala ai khublei ia ka Garo Hills Autonomous District Council’s (GHADC) kaba la shim ia ka rai ban khanglad ia ki bym dei riewlum ban iakhun ia ka elekshon jongka Council bad ong, ba kane kadei ka histori ha kaban iada ia ka jinglongtynrai ki riewlum bad kyntu ruh ia ki artylli ki district council ha ri-lum Khasi bad Jaintia ba kin shim lang ia katei kajuh ka sienjam.){kind=link}