Shillong, Risaw 13 : I MLA ba shah sospon ka Congress Kong Ampareen Lyngdoh hynne ka sngi palei, ila iaroh ia ka rai jong ka Sorkar MDA ban sngap ia ka sur jong u paidbah da kaba rai ban pynduh pyndam ia ka Meghalaya Regulation of Gambling Act (MRGA), 2021.
“Ka dei karai kaba biang bha namar ka dei ka sur jong u paidbah. Ka jingiatai nia kan don beit halot kane hynrei lada bun ki paidbah ki ong ba kim kwah ia ka gaming Act, ai ba kan long kumta” ong I kong Ampareen haba iakren bad ki nongthoh khubor.
Kane kala mih hadien ba u Myntri ka Tnad Taxation James K Sangma ula kular ban pynthikna ia ka jingpynduh pyndam noh ia ka MRGA Act, 2021.
Haba pynpaw ba baroh ki kam ki don ia kiba ai jingmyntoi bad kiba ktah, ine u MLA ka East Shillong ula ong la ki paidbah ka Jylla ki long kiba kwah ne em ban pdiang ia ki casino ka dei kaba ngi hap ban iakren.
I Kong Ampareen ila pynkynmaw ba I dei ma i, iba nyngkong eh ban tyrwa ia ka jingpynkylla ia ka Gaming Act ha ka por ba wanrah ha ha Iingdorbar ha u snem ba la lah.
“Nga dei ma nga kaba ieng ha Iingdorbar ban tyrwa ia ka jingpynkylla bad kyrpad ban nym pyniaid shakhmat ia ka jingwanrah ia ka Gaming Bill hynrei ki paidbah ha katei ka por kim pat sngewthuh” ila ong haba bynrap “Nga la leh iala ka jong ka bynta bad nga kmen mynta ba ka Sorkar kala sngap ruh ia ka sur jong nga, ym tang jong nga, hynrei jong kiwei ruh ki dkhot kiba la ieng ha Iingdorbar ban iatai halor ka Gaming Bill”.
Haba kylli, I Kong Ampareen ila ong ba mynta i khmih lynti ba ka Sorkar kan mynjur noh ia ka Ordinance halor kanekakam lane khot ia ka Dorbar ba kyrpang jong ka Iingdorbar ban pynduh pyndam noh ia ka Gaming Act.
