Nongpoh, Risaw 20: U wei u briew u la khlad hashen katba u wei pat u la mynsaw jur ha ki ar tylli ki jingjia tyngkhuh ha surok bah National Highway-6 ha Shangbangla bad ha khlaw Umling, Ri Bhoi District.
Kat kum ka jingpyntip na ki pulit ka Nongpoh Traffic Branch, la iathuh ba ha hynne ka step por 4 baje, kawei ka kali truck container ML 05 P 3599 kaba dang wan kiew na Guwahati sha Shillong, ka la leit tynrah ia u divider jong ka surok bah NH-6 ha Shangbangla bad kylla noh ha katei hi ka jaka ha kaba u wei u briew u ba la tip kyrteng kum u Abijit Barbara na Laban, East Khasi Hills u la khlad noh hashen.
Ha kawei pat ka jingjia kaba la jia ha ka por 8 shiteng eiei mynstep ha kawei ka jaka ha khlaw Umling, kawei ka trok AS 25 FZ8376 kaba dang wan na Shillong ban leit sha Guwahati ka la leit ban tynrah ia u divider jong ka surok bah bad leit tynrah markhmat pat ia kawei ka kali kaba wan markhmat kaba don ia u number ML 10 C 5589 ha kaba u nongniah jong katei ka kali rit ba la tip kyrteng kum u Arjun Chettri u ba na ka shnong Pahamlapong, Nongpoh u la mynsaw jur.
Ia une uba mynsaw la pynkit noh marmar sha Nongpoh Civil Hospital bad hadien la pynkynriah noh sha Bethany Hospital ban ioh ia ki jingsumar.
Na ka liang ki pulit, ki la pyntip ruh, ba u nongniah jong katei ka trok kaba la leit tynrah ia ka kali rit, u la phet krad ialade na katei ka jaka, bad ki pulit ki dang pynlong ia ka jingtohkit halor kine ki jingjia tyngkhuh kali.
