Shillong, Jylliew 11 : Uwei u briew ula iap bad arngut kila mynsaw kynthup ka nongwan shangkai pyrthei na Kolkata, ha ka jingiatynrah para scooty hynnin ka miet sngi Nyngkong ha Nongbah Shillong.
Kat kum ka khubor ba ioh lum, kane ka jingjia kalajia ha Malki Point ha ka por 10:30 baje mynmiet. Kine ki scooty kiba iatynrah ki dei kiba don u nombor ML05-AA-8256 bad ML05-Y-1286.
Ia u briew ba khlad ym pat shym la lah ban ithuh kyrteng bad la pynbna iap ia u ynda poi ha Shillong Civil Hospital. U briew ula mynsaw ba iashonglang bad uba iap, u dei uba tip kyrteng u Bishal Mondal ba 20 snem na Demseiniong.
Ki nongsakhi ki pyntip ba une u briew uba iap u khlem phong helmet satia ha ka por ba jia kane ka aksiden.
Kane ka nongshangkai suwari na Kolkata ka kyrteng ka Lisa Pradhan ba 34 snem, kaba la mynsaw ha ryngkat u kurim u Devendra Nayak ba 37 snem, uba lait na ka jingmynsaw. Kine ki shi kurim kila wan shuti sha nongbah Shillong.
