Nongpoh, Nailur: Ha ka jingjia aksiden, u nongniah ka kali kit gas u la iap hashen na ka jingiatyngkhuh kali kaba shyrkhei kaba la jia hynnin ka miet ha ka shnong Umrangksai jong ka surok bah NH-6 ha Ri Bhoi District.
Ka khubor ba la iohlum na ki pulit ka Nongpoh Police Station, la pyntip ba kane ka jingjia tyngkhuh kali ka la jia ha ka por mynmiet kumba 10 shiteng eiei, ha kaba kawei ka kali kit gas (Gas tanker) ka la leit ban tynrah nadien ia kawei pat ka kali ka bym lah ban tip satia haduh ba u nongniah ba la tip kyrteng kum u Achik Barbuyia na Silchar ryngkat bad u Nongud Sunil Nath, ki la mynsaw jur.
La ioh jingtip ruh, ba ki riew paidbah kiba la sakhi ia kane ka jingjia tyngkhuh kali, ki la pynkit marmar ia ki briew kiba la mynsaw sha Nongpoh Civil Hospital na ka bynta ki jingsumar hynrei ki bor ka hospital ki la pyntip ba u Achik Barbuyia u la khlad noh na ka jingmynsaw kaba la jur palat bad la pyntip ruh sha ki bahaiing hasem halor kane ka jingjia.
