Nongpoh, Nailar 13 : Uwei u Home Guard ula iap ha ka jingaksiden kali kaba la jia ha ka janmiet sngi Balang hapoh ka surok National Highway-6 ha ka lad ban leit sha Narbong, Byrnihat.
Kat kum ka jingiathuh ki Pulit, une u Home Guard ula iap na ka jingiatynrah hapdeng ka kali pickup AS25-EC-3468 kaba kit ia u post elektrik ka kompani NEzone, bad ka trok AS01-FC-9640.
La ong ba une u Home Guard ula iap na ka jingshah ban ha ki post elektrik katba u dang don ha ka kam ban pyniaid ia ki kali, kaba la lam sha ka jingmynsaw jur une u Home Guard.
Kane ka jingjia kala jia ha ka por 6:35 baje janmiet bad une u Home Guard u dei uba la tip kyrteng u Bah Megellan Sohkhlet uba shong bas ah ha Pahamsohthri.
Mar mar la pynkit ia une u Home Guard sha PHC Byrnihat hynrei namar ka jingmynsaw jur, ki doktor kila pyntip ba ula khlad lypa ha lynti.
Ki Pulit ki iathuh ba u nongnoah jong ka kali pickup ba kyrteng u Gandhi Kalita na Pachim Boragoan ba hap hapoh ka Gorchuk Police Station, Kamrup, Assam, ula phet krad mar syn jia kane ka jingjia bad tang hadien katto katne por, ula leit ban pyndem ialade hakhmat ki Pulit ka Byrnihat.
Katei ka Trok kaba kit ia u Coke ka dei kaba niah da u John Paul Khardewsaw uba shong basah ha New Nongstoin bad kane ka jingjia ka la jai ruh ha ka por ba baroh kitei ki ar tylli ki kali ki dang thmu ban wan sha Nongpoh.
