Shillong, Naiwieng 17: Uwei u shipai ba bat kyrdan Colonel bad uba trei ha Shillong ula iap na ka jingshah tynrah kali ba jia ha ka janmiet sngi Balang ha 101 area, Upper Shillong.
Une u heh shipai ba kyrteng u Ramesh Rathore ula shah tynrah ha ka kali ba pynher sted bha ha ka por 5 baje janmiet katba u dang mih na ophis lajong. Ia une u shipai la rah mar mar sha hospital hynrei hadien ula khlad noh.
“Ha ka jingjia ba sngewsih, u col. Ramesh Rathore jong ka 12 armd Regt, uba bat kum u Col. A HQ. 101 area Shillong, ula iap hadien ka jingshah rat ha ka kali scorpio ba pynher sted bha katba u dang mih na Ophis ha ka por 5 baje” ong u Defence PRO.
U khun jong u, u dei uba dang shu ioh rung shen ha ka National Defence Academy (NDA).
” La shem ba ka jingpynher sted, jingniah khlem akor bad jingniah kali ha ka jingbuaid ka dei ka daw ha kiba bun ki jingjia aksiden ba shim ia ki mynsiem briew” Ong u EJH SP Jagpal Singh Dhanoa haba kren sha ki nongthoh khubor.
Ka jing pyndep ia ka lehniam leh rukom ba khatduh ia une u heh shipai kan long ha ka shnong jong u ha Ghanau Sadulpur kaba don ha Churu district ka Rajasthan.
