Nongpoh, Nailur 13: Uwei u briew ula iap hashen bad uwei pat ula mynsaw jur ha ka jingjia aksiden kali kaba jia ha ka janmiet sngi Saitjai ha ka thain Byrnihat.
Kat kum ka jingiathuh ki Pulit, kane ka jingjia aksiden ka dei kaba la jia hapdeng ka thuk thuk ML05-H-6209bad ka kali kit umphniang NL01-AA-9592.
Ki Pulit ki iathuh ba kane ka thuk thuk ba niah da u Apkyrmen Khongjoh bad uwei pat ba shong hadien u Laitphar Suting ba na Umtyrnga, Ri-Bhoi, kala shah tynrah ha kane ka trok kaba la pynher sted bha, kaba la niah da u Tapan Nath, uba dei na Guwahati.
Ki Pulit ki iathuh ba kane ka thuk thuk ka dei kaba dang mih na Umling ba leit sha Umtyrnga hynrei dei haba poi ha Byrnihat NH-06 marjan ka John Kitchen Restaurant, kane ka jingjia aksiden kala jia noh.
Ki iathuh ba ha kane ka jingjia, baroh arngut kiba shong thuk thuk kila mynsaw jur bad la pynkut noh sha Byrnihat PHC ban ioh jingsumar bad la pynkit ia ki da ka kali 108 hashuwa ban poi ki Pulit. Hynrei ki doktor ba don ha Hospital, kila pynbna ba u samla ba shong hadien ula iap ha lynti.
Ia ka metiap la pynkit noh sha ka jaka buh metiap ha Civil Hospital. Ki Pulit kila kurup noh ia baroh artylli ki kali bad la set ia ki ha Byrnihat OP. Ka jingtohkit mynta kala iaid shakhmat.
