Nongpoh, Nailur 17 : Uwei u nongbylla sngi ula iap hashen hadien ba u hap na ka jingtei ba jrong kumba 20 phut jong ka karkhana Yummy, kaba don ha ka shnong 10 Mer, Ri-Bhoi District, kaba hap hapoh ka Khanapara Police Station.
Une u nongbylla ula hap katba u dang pynpra ia ka slap jong ka jingtei katei ka karkhana ba thmu ban pynpra.
La iathuh ba kane ka jingjia kala jia ha ka janmiet sngi Balangha ka por kumba 6 baje eiei. Une u nongbylla u kyrteng u Ratul Deka ba 40 snem ka rta, uba dei na Kulmabari, Morigoan, Assam.
Hadien kane ka jinghap, ki paralok bad ki nongtrei ba iatreilang, kila pynkit noh mar mar ia u sha ARHI hospital kaba don jan tam. Hynrei namar ka jingmynsaw jur na kakhlieh, ki doktor kila pyntip ba u Ratul ula khlad shuwa ban poi hospital.
Ki Pulit ka Khanapara kila leit shimti ia ka met bad pynkit noh sha Civil Hospital, Nongpoh ban pyndep ia ka post mortem. Ki pulit kila register case halor kane ka jingjia bad ka jingtohkit mynta kala iaid shakhmat.
