Nongpoh, Nailur 17 : Ka ding kaba shyrkhei bha, kala bam duh ia artylli ki karkhana-kawei ka karkhana pynmih jri bad karkhana shna trok lem bad 20 tylli ki iinglynter ba sah ki nongtrei, ha ka step sngi Palei ha ka thain 13 Mer, Byrnihat, Ri-Bhoi District.
Kane ka jingjia kala jia ha ka por 11 baje mynstep bad iathuh ba ka ding kala bam duh ia baroh ki jingdon jingem ha kine ki karkhana bad kine ki iingba sah briew.
Kat kum ka khubor la iathuh ba kane ka jingpluh ding kala jia ha ka por ba ki trai jong kine ki karkhana bad ki briew kiba sah ha kitei ki iing ba don hajan ki karkhana, ki dang leit sha ka jaka mane puja.
La iathuh ba ka ding kala pur sted bha bad bam duh ia ki jingdon jingem kynthup ia ki tiar kiba pyndonkam ha kine ki karkhana shna trok bad ki tiar spare part.
Ki trai kila suba jur ba kane ka jingpluh ding ka lah ban dei na ka jingthut jong ka bording elektrik na kitei ki iing, hynrei ia ka daw ba shisha ym pat shym la lah ban pynthikna.
Ka jingpoi kloi ki pulit pynlip ding na Byrnihat ryngkat ki kali pynlip ding na Assam, la lah ban tem noh ia ka ding shuwa ba kan pur sha ki duan kiba don marjan bad sha ka petrol pump kaba don hajan katei ka jaka.
Ki Pulit kila register case halor kane ka jingjia bad ka jingtohkit mynta kala iaid shakhmat.
