Nongpoh, Iaiong 15: Haduh 24 ngut ki briew kila duh ia la ka jingim na ka jingjia aksiden kali ha ki surok ka Ri Bhoi district naduh u bnai Kyllalyngkot mynta une u snem.
Kine ki aksiden kila jia ha kylleng ki bynta jong ka district, hynrei kiba bun hi ki dei kiba la jia ha ka surokbah NH-06 bad ha ka surok Shillong Bypass.
Katkum ka kaiphod kaba la iohlum, la pynpaw ba kiba bun na ki jingjia aksiden ki dei ha ki jaka ba bun bha ka jingiaid ki kali kum ka Umlyngkdait, Mawdiangum, Byrnihat, Umsning Bypass bad Bhoirymbong.
Ki katto katne kiba la khlad noh ki dei ki briew na katei ka thain hi, katba kiwei pat kidei ki nongleit nongwan na kiwei pat ki jylla.
Katkum ka jingpyntip ki pulit ka Ri-Bhoi ha ka Facebook jongki, kila kdew ba kala don ka jingkiew bha ha ka jingjia aksiden namar ka jingniah kali khlem akor, ka jingpynher sted ia ka kali kaba la long palat pud, ka jingniah kali haba la shoh khawiang, ka jingpynieng be-ain bad ka rukom pynieng ha ka por ka bym dei ia ki kali ha ki jaka kiba long khun bad ka jingkit palat pud kaba la buh ha ka jingma.
Dang ha ka taiew kaba la dep, ki Pulit jong ka Nongpoh Police Traffic Branch kila pynlong ia ka jingkhmih bniah ia ki kali kiba iaid ha ka surokbah National Highway 06, da kaba phaikhmat eh sha ki nongniah kiba pynkhein ia ki kyndon niah kali jong ka Motor Vehicle Act. Tang hapoh katto katne kynta, ki pulit kila iohlum kumba T. 2.99 lak kum ka jingdain kuna na ki nongpynkhein ia ki kyndon ain.
