Sivasagar, Naiwieng 08 :Haduh kumba 150 tylli ki sniang kila iap hapoh Sivasagar district ka Assam namar ka jingsyllad jong ka jingpang sniang ba la tip kum ka African Swine Fever.
Katkum ka jingiathuh da ki heh sorkar ka district, ki shnong kiba la shah ktah jur tam hapoh Sivasagar ki kynthup ia ka Dehing Kalghar bad ka Jalukonibari.Kila don ruh ki khubor kiba iathuh ba ia ia ka doh bad ki sniang kynthup ia kito ki khun sniang kiba la shah ktah ha kane ka jingpang la pynkit na Panbecha, Banmukh, Betbari, Meteka bad Hansara hapoh ka district.
Ka ophis ka District na ka tnat Animal Husbandry & Veterinary kala ong ba kila dep ban shim ia ki sienjam kiba kyrkieh ban khanglad ia ka jingkit ia kine ki sniang.Khnang ban pynsangeh shuh shuh ia ka jingsaphriang jong kane ka jingpang, na ka liang ka tnat Animal Husbandry & Veterinary kala aijingmut mardor sha ki nongshong shnong ba ki dei ban pyniap noh mardor ia kito ki sniang kiba la shah ktah ha kane ka jingpang.
Ha kawei pat ka bynta, ki bor ba dei khmih jong ka Sivasagar District ruh kila shim ia baroh ki sienjam ban tehlakam ia ka jinglong jingman.
Ka jingdie, ka jingbuh bad ka jingpynkit ia ki sniang na ka sor rit Sivasagar bad kiwei pat ki jaka kiba hapoh hapoh ka Sivasagar Revenue Circle la khang pyrshah lyngba ka hukum ba la pynmih da ki bor pyniaid ka district.
Watla katta, wat hadien ki sienjam ba la shim da ki bor pyniaid ka district bad na ka tnat Animal Husbandry ban tehlakam ia kane ka jinglong jingman, hynrei kiba bun ki briew kim shym la bud satia.
Kiba kum kine ki jingjia kila paw pyrthei ruh hadien ba la shem ba ki don katto katne ki nongshong shnong kiba ha ka jaka ban pyndonkam da ka juk jingstad kumba la bthah da ki bor sorkar pynban kila jied ia ka lynti ban shu leit bret ia kine ki jingri ba la iap shapoh ka wah Dorika.
Na ka liang ki riew shemphang na ka tnat Animal Husbandry kila pynpaw ka jingsngew bynniaw kaba jur ha kaba iadei bad kine ki jingjia kaba ym tang ba kan pynjur ia ka jingsaphriang jong kane ka jingpang hynrei ba kan nang saphriang ruh sha kiwei pat ki jaka kiba jngai.Kala don ruh ka jingma kaba khraw ba une u khniang jingpang uba la ktah ia kine ki jingri u lah ban wanrah ia ka jingiabit kaba shyrkhei.
Ha kawei pat ka bynta na ka liang ki nongshong shnong kila kynnoh ia ka tnat Veterinary halor ka jingbym lah ka jong ki bad ka jingpynslem ban shim ia ki sienjam ban tehlakam ia kane ka jinglong jingman.
