Guwahati, Iaiong 25: Arngut ki briew kiba la shah set ha Phatok kaba don ha Nagaon District jongka Assam kila khlad noh hynne ka sngi Saitjain ha ka rukom kaba suba sniew, la ong ki ophisar.
Kine kiba la khlad noh ki kynthup ia u Jitumoni Konwar bad u Rup Singh Dera bad kine kila iap ha la ki jong ki jaka shah set.
Ia u Konwar la shem ba ula iap ha ka jingthiah ka jongu ha Nagaon Central Jail dang step phyrngab, katba u Dera ula khlad ha kawei pat ka jaka set jongka Nagaon Special Jail.
U Dera, udei uba shong basah ha Lanka ha Hojai district bad la kynnoh ba u donkti ha ka kam pyniap briew.
Haduh mynta ym pat lah ban tip ia ka daw tynrai jong ka jingiap jong kitei ki arngut bad la pynlong ia ka jingtohkit ban lap ia ka jingshisha.
U Nagaon District Commissioner ula hukum ban pynlong ia ka Inquiry bad la thung ia u Additional Deputy Commissioner u Gopal Sharma ban ialam ia ka jingtohkit.
“Ngi lah phah ia kitei ki met sha Nagaon Medical College ban leh ia ka Postmortem. Yn sa tip ia ka daw tynrai halor ka jingiap ka jongki hadien ba la ioh pdiang ia ki kaiphod. Ka jingtohkit ka dang iaid shakhmat” la ong u heh ophisar pulit.
