Kohima, Nailur 21: Ha ka jingjia aksiden ba shyrkhei, phra ngut ki briew kila iap katba arngut kila mynsaw jur na ka jingiatakhuh hapdeng kawei ka Tata Sumo bad ka trok hapoh Tseminyu District ka Nagaland.
Kat kum ka khubor, kane ka jingjia kala jia ha ka sngi Balang bad kine ki briew kiba iap ki dei kiba shong ha ka Tata Sumo kaba la kyntien ia ki na ki shnong kiba don hapdeng ka Usha bad Seneu jong ka District.
“Phra ngut ki briew na Tata Sumo ba don u nombor NL02-T-2124 kynthup u Nongniah, kila iap hashen hadien ba kala hap shariat ba don ha kynriang ka surok” ong ki Pulit.
Ki iathuh ba kane ka Tata Sumo ka dei kaba mih na ka thain Mokokchung ban leit sha Kohima. La iathuh ba u Nongniah bad u nongbud jong ka trok, kaba la hap lang sha riat, kila mynsaw jur ha kane ka jingjia.
Ia kiba mynsaw la pynkit mar mar sha Hospital bad ka jingtohkit mynta kala iaid shakhmat.
Napdeng ki briew kiba iap, lain gut ki dei ki Kynthei kiba dang shu dep pass ia ka ksam Nagaland Staff Selection Board (NSSB) bad dang shu ioh pdiang ia ka shithi thungkam ha ki tnad Sorkar kum ki nongtrei Grade-3.
Kine kiba iap ki kynthup ia hynriew ngut ki kynthei bad arngut ki shynrang kynthup u Nongniah.
U Myntri Rangbah ka Nagaland Neiphiu Rio, haba pynpaw ia ka jingsngewlem halor ka jingkhlad, ula pynbna ban ai jingiarap ba mar T. 2 lak sha ki bahaiing hasem jong kine kiba iap.
