Shillong, Jylliew 16: Saw ngut ki shipara ba dang hapoh 9 snem ka rta, kila iap na ka jingshah ban ha ka khyndew kaba la twa bad leit tap beit beit ia ka Iing kaba ki shong ki sah.
Kane ka jingjia kala jia hynne ka step sngi palei por 10 baje hapoh ka Shnong Laitlarem, kaba hap ha ka shnong Nongspung, East Khasi Hills District. Ia kane ka jingjia la pynthikna da u Secretary ka Shnong Bah John W Kharmyndai.
Lai ngut na kine ki heprit kila iap hashen bad kine ki kyrteng I Wanlambiang Kharmyndai ba 9 snem ka rta, i Ibanlumlang Kharmyndai ba 6 snem ka rta bad I Ribhalin Kharmyndai ba 4 snem ka rta.
Iwei pat I heprit ba dang phra snem ka rta, ila khlad ha lynti ban leit sha Sohiong Primary Health Centre (PHC) ban ioh ia ka jingsumar. Ine I heprit I kyrteng I Daphi Banri Kharmyndai.
Ka jingther u slap ha kine ki shitaiew tam kala pynshong synjor ia kiba bun ki lum ha kylleng ki jaka jong ka Jylla bad ula wanrah ruh ia shibun ki jingtwa khyndew bad ka jingshlei um hapoh ka Jylla.
U Secretary Shnong Laitlarem u pyntip ba kane ka Longiing ka dei kaba don khyndai ngut ki dkhot kynthup ia ka Kmie bad u Kpa bad hynriew ngut  kila lait im da ka jingkloi iarap u Kpa uba la mynsaw ialade ha kane ka jingjia.
Ula pyntip ruh ba na ka liang jong ki bor sorkar kynthup ki Pulit kila wan poi mar mar sha kane ka jaka ban ai jingiarap ia kane ka longing.
