Nongpoh, Risaw 20: Arngut ki shipara kila khlad haden bad uwei ula mynsaw ha ka jingshah tynrah ha kawei ka trok katba ki dang leit phai shala iing hynnin ka miet shiteng synnia.
Kane ka jingjia kala jia ha ka surok Nongjri ha ka shnong Umsohlang, Umsning. La iathuh ba ka jingjia kala jia ha ka por 12 baje mynmiet.
Kine ki shipara kiba khlad ki dei kiba la tip kyrteng da u Borlin Marngar ba 26 snem ka rta bad u Jobinshon Marngar ba 21 snem. Uba mynsaw u dei uba la tip kyrteng u Rangbashlur Malih ba 30 snem ka rta.
Ki Pulit haba ioh jingtip ia kane ka jingjia, kila leit wut wut sha katei ka jaka ban tohkit bad kila shem ba ka trok kaba tynrah, kala phet krad na kane ka jaka.
Ki Pulit kila pynkit noh ia kine ki briew sha Umsning CHC hynrei u doktor ula pynbna ba arngut kila khlad.
