Shillong, Risaw 20: Ka Thadlaskein Sports Association (TSA) kala pynthymmai ia ki nongkitkam ba pura hadien ka jing shah suspon mynta la katto katne snem.
Ka TSA kala duh noh ia ka jingithuh na ka Meghalaya Football Association (MFA) ha u snem 2019 namar ka jingpynkhein iaka riti treikam bad ia ki kyndon jingbthah jong ka MFA.
Da ka jingshimkhia ki trai shnong, la jied ia ki nongkitkam kiba shipor hapoh ka jingialam u Chairman bad Convenor ryngkat ka jingkyrshan jong ki 31 tylli ki Club kiba pyniasoh bad ka TSA.
Katei ka kynhun kala phah da ka jingthoh sha ka MFA, kaba dei ka kynhun kaba peit bad pyniaid ia ka jingialehkai football ha ka jylla, ha kaba kala kyrpad ban weng noh ia ka jingsuspon bad ban plie lad ban lum ia ka jingialang jong ka General Body ban ioh jied ia ki nongkitkam kiba thymmai, kumta ka MFA kala jubab ia katei ka jingkyrpad jongka TSA.
La pynlong ia ka ka jingialang jong ka General Body ha ka sngi saitjain ha Wahiajer Community Hall. Ka kynhun jong ka MFA kala leit iashimbynta ha katei ka jingialang bad iaka jingjied ia ki nongkitkam kiba thymmai la pynlong hapoh ka jingpyniaid jong u General Secretary ka MFA u Bah Sunesh Syiem.
“Ngi kum ka MFA ngi dap da ka jingkmen ba ngi la lah ban pynkhie im biang ia ka Thadlaskein Sports Association hadien katto katne snem” ong u Bah Syiem hadien ba la wai ka jingialang.
Ka thain Thadlaskein kadei ka jaka kaba kyrpang kaba la sei bad pynmih ruh ia ki nongialehkai kiba donsap kiba la mihkhmat ia ka jylla bad ia ka ri.
Ia ka TSA yn ialam da u President u Bah Kmenlang Shylla, Vice-President kiba kynthup ia u Bah Ebris Pariat bad Mutchwa Thabah. U General Secretary bad Assistant GS ki kynthup ia u Ebormi Lyngdoh bad Herperty Khyriem.
U Bah Pyrkhatbha Lamare kum u Treasurer bad la thung ruh ia ki Secretary jong ki committee bapher bapher bad la jied ruh ia ki Executive Member.
 kala pynthymmai ia ki nongkitkam ba pura hadien ka jing shah suspon mynta la katto katne snem.){kind=link}