Jorabat, Nohprah 15: Ar ngut ki samla pule ka skulbah Don Bosco University, Sonapur Assam, ki la khlad noh bad u wei u la mynsaw jur hadien ba ka thuk thuk kaba ki shong, ka la leit ban tynrah ia kawei ka trok kit mar.
Kane ka jingjia ka la jia hynne ka janmiet sngi Thohdieng ha ka por 3 baje eiei halor ka jingkieng suin (over bridge), Jorabat.
Katkum ka khubor ba la iohlum, la pyntip, ba kane ka jingjia tyngkhuh kali ka la jia ha ka por ba kine ki samla pule ka Don Bosco University ki dang wan na Sonapur ban leit sha Guwahati da kawei ka thuk thuk kaba don ia u number AS 01EJ 7870 bad hadien ba ki la poi halor katei ka jingkieng suin, ki la kum tynrah ia kawei ka trok na ki bynta ba shadien kaba don ia u number NL 01 AE 1887 haduh ba ki la mynsaw jur.
Na ka liang ki bor pulit, ka Jorabat ki la leit marmar sha katei ka jaka ban pynlong jingtohkit bad ban pynkit noh ia kine baroh 3 ngut kiba la mynsaw jur sha ka GMCH ban ioh ia ka jingsumar hynrei arngut ki la khlad noh namar ka jingmynsaw kaba la jur.
Ki arngut kiba la khlad noh ki kynthup ia u Kethosetou na Kohima, Nagaland u ba pule ia ka subjek Economic bad u Shreyan Roy na Assam u ba pule ia ka BSC Hospitality.
