Guwahati, Risaw 06 : Ha ka jingjia ba sngewsih, arngut ki briew kila iap bad saw ngut kila mynsaw hadien ka jingbthei jong u bomb mortar ha Jalpaiguri, West Bengal, uba la wan rong ka umsaw ka wah Teesta na Sikkim.
Kane ka jingjia kala jia ha ka miet sngi Palei, ong ki Pulit kiba pyntip ba une u bomb mortar u dei jong ki shipai uba la rong da ka wah Teesta na Bordang sha Jaipaiguri.
Ki Pulit ki iathuh ba saw ngut ki briew kila mynsaw bad la pynkit ia ki sha Hospital ban ai jingsumar. Ia ki arngut ki briew ba iap ym pat lah satia ban pynthikna ia ka kyrteng.
Kat kum ka jingong ki Pulit, kine ki lanot hadien ka jingiohi ia u bomb mortar, kila pyrshang ban leit peit bad ktah hynrei kynsan kynsan une u bomb ula bthei. La ong ba ki saw ngut kila mynsaw ruh ki don hapdeng ka jingshitom kaba jur.
Ka Sorkar Sikkim ha ka sngi palei kala maham pyrshha ia ka jingdon ki bomb bad ki kuli ha shi lynter jong ka wah Teesta hadien ba ka umsaw kala rong ia bun ki tiar ialeh jong ki shipai n aka jaka buh tiar kaba don ha Bordang.
Ha kawei ka liang, ka Sorkar Pdeng kala mynjur ban ai ia ka song jingiarap kaba kot T. 44.8 klur sha ka Jylla Sikkim. Ia kane ka song pisa la ai jingmynjur da u Myntri kam Pohiing Amit Shah ban ioh ai jingiarap mar mar ia ki paidbah ka Sikkim.
