Kiew arshah ka jinglum khajna ha Jylla tang ha ki hynriew snem
Shillong, Feb 12: U Myntri Rangbah ka jylla Meghalaya Conrad K. Sangma, uba bat ruh ia ka tnad pla tyngka, u la pyniaid ia ka jingiamir jingmut kaba nyngkong eh jong ka jylla shwa ban shna ia ka mang tyngka na ka bynta u snem mang tyngka 2025-26 ha ka sngi thohdieng.
Ka jingiakren ka la pynleit jingmut halor ka jingpynkiew ia ka khajna, ka jingpyniaid ia ka pisa tyngka, bad ka jingiashim bynta jong ki nongshong shnong ha ka jingpynkhreh ia ka mang tyngka.
Haba ai ia ka jingkren, u Myntri Rangbah u la pynpaw ia ka jingdonkam jong ka jingiashimbynta lang ki paidbah. “Kane ka mang tyngka ka dei na ka bynta ki nongrep, ki nongseng kam seng jam, bad baroh ki kynhun bapher bapher. Ngi lah ban ym kynthup lut ia ki jingai jingmut mardor, hynrei ngin kynthup katba ngi nang iaid shakhmat. Ka jingai jingmut na ki paidbah ka lah ban long kaba lah ban wanrah ia ki jingkylla,” ong u Myntri Rangbah.
Kane ka sienjam ba shim ka dei kaba la pynkhreh ban iashimbynta lang baroh, ha kaba ia ki polisi la thaw katkum ka jingai jingmut jong ki paidbah. Ia kane ka sienjam kaba nyngkong eh la niew da ki nongshim bynta kum kaba ‘pynmyntoi ia u paidbah’ bad ba wanrah ka ‘jingpynkylla’.
Uwei u nongiashim bynta uba la san ka rta u la ong ba kim ju poi pyrkhat ba ka sorkar kan pyniadon bynta lang ia ki paidbah ha ka jingpynkhreh ia ka mang tyngka. “Kane ka dei ka sien kaba nyngkong eh, ngi la ioh ia ka jingsngewthuh halor ka rukom pynkhreh ia ka mang tyngka bad kumno la mang pisa bad pyntreikam ia ki prokram jong ka sorkar”, u la ong.
Haba kren shaphang ka jingkiew ha ka liang ka jingkiew ka jingpynmih pisa ha ka jylla, u Myntri Rangbah u la ai khublei ïa ka jingpyndonkam bha ïa ka pisa na ka bynta ka jingkiew ka ïoh ka kot jong ka jylla. “Ka pisa ka don ha Delhi, hynrei ka jinglah jong ngi ban shim bad pyntreikam hok ïa ka ka long kaba kongsan, katba ngi dang ïakren bad ka Sorkar India ban bei tyngka na ka bynta ka bha ka miat jong ngi bad ki sienjam ba ka Jylla ka shim ban wanrah ia ka roi ka par.”
“Ka jingkiew ka Meghalaya ba kot 16.2%, kaba palat ia ka jingkiew jong ka ri baroh kawei, ka pyni ia kane ka jingkiew,” la kynthoh u myntri rangbah.
Halor ka jinglum khajna, u Myntri Rangbah u la pynpaw ba ka jinglum khajna ka la kiew ar shah ha ki hynriew snem—na ka T.1,450 klur sha ka T.3,217 klur. U la ong ruh ba tang ka khajna kyiad ka la kiew na ka T.199 klur ha u snem 2018 sha ka T.458 klur ha u snem mang tyngka ba la dep, da kaba khmih lynti ba kan palat ïa ka T.500 klur mynta u snem.
U Myntri Rangbah u la pynshong nongrim ia ka jingkiew ha ka jingpynmih pisa na ka jingpynkylla ia ki polisi bad ki rukom peit bniah ba la pyniaid da ka teknoloji kiba la tehlakam ia ka jinglait tuh ki khajna.
Halor ki jingeh ha sor, u Myntri Rangbah u la ban jur halor ka jingdonkam ban pyniar ia ka sor Shillong bad ban pynwandur ia ki jaka synshar (Administrative hub) ba thymmai ban ialeh pyrshah ia ka jingkhapngiah. “Ban pynduna ïa ka jingkhapngiah ha Shillong ka donkam ïa ka jingpynheh ia ka sor bad thaw ia ki knowledge city kum ki jaka pynroi,” u la bynrap.
Haba jubab ïa ki jingkylli jong ki paidbah na ka Facebook LIVE, u Myntri Rangbah u la pynpaw biang ïa ka jingkular jong ka sorkar ban pynkhlaiñ ïa ka jingpule ba kham shalor bad ban kyntiew kyrdan ïa ki skul. U la ong ba ki jingbei tyngka kiba dang ïaid shakhmat ha ki jingtei jong ki skul sorkar bad ka jingseng ïa ki 23 tylli ki kolej paidbah ba thymmai ban kyntiew ïa ka jingpynroi ïa ki sap bad jinghikai, ki dei ki sienjam bala shim da ka jingthmu ban kyntiew ïa ki jingdonkam ha ka pule puthi.
Haba pynpaw ba ka jingai jingmut na ki paidbah ka don ia ka bynta kaba kongsan ha ka synshar khadar, u la ong, “Ka CM-Connect ka dei ka sienjam bala shim da jing thmu ban wanrah ia ka jingtreikam kaba shai bad ka jingkitkhlieh ha ka Sorkar. Nga pdiang sngewbha ïa ka jingshah kynthoh namar ka pynbor ïa ngi ban pynbha ïa ka jingsynshar bad ka jingai jingshakri.”
Ha kane ka jingiamir jingmut la ai jingbatai ruh ia ka mang tyngka da u Dr. Vijay Kumar D, Commissioner bad Secretary ka tnad pla tyngka.
