Shillong Jylliew 22: Kum shi bynta ban pynphriang ia ka khubor ban iakhun pyrshah ia ka jingkynrei jong u drok ha ka jylla, ka la don ka jingialehkai paralok hapdeng ki nongthoh khubor ka Jylla hapoh ka lama jong ka Shillong Press Club bad ka DEF East Khasi Hills jong ka Meghalaya Police ha SAI Football Ground kaba don ha NEHU Campus,
La donlang ruh ha kane ka sngi naduh u Director General of Police ka Meghalaya, u Dr. LR Bishnoi uba ha ka jingkren kum u Kongsan u la ong ba u drok mynta u la phriang ha baroh kawei ka jylla kynthup wat ha nongkyndong ruh.
“Mynta ka tnad pulit ka la pynlong ia ka jingpynsngewthuh paidbah kaba man ka por nalor ba ka peitngor ruh ia kito ki nongkhaii drok ha ka jylla,” ong u DGP hadien ba la wai ka jingialehkai.
Da kaba pynpaw ia ka jingkmen ba u ioh ban sakhi lang ia ka jingialehkai paralok hapdeng ki ar tylli ki tnad kiba kongsan tam, u DGP u ong ba kane hi kan long ka lynti na ka bynta ban iakhun lang ia katei ka nongshun ba shyrkhei.
Ha katei ka jingialehkai, ka kynhun jongka Meghalaya Police ka la ioh ban pynliem da 4-1 kol ia ka Shillong Press Club. La donlang ha kane ka sngi naduh u IG Mukesh Singh, DIG Eastern Range Davis R Marak, SP East Khasi Hills Sylvester Nongtnger, SP (Shillong City) Vivek Syiem bad u President Shillong Press Club David Laitphlang.
