La pynthymmai ia ki Nongkitkam ka WKH District
Nongstoin, Naiwieng 17: Ka Federation of Khasi Jaintia & Garo People (FKJGP) kala khot la wer ia ki dkhot ka Seng ba kin iatylli kawei bad don ka mynsiem ban shakri hok naduh met bad mynsiem ia ka Jaidbynriew haba buh shadien ia ka jingkwah ban myntoi shimet.
Kane ka sur kala mih na ki nongialam ka FKJGP Sengkmie haba ai jingkren ha ka jingialang pynskhem ia ki nongkitkam ba thymmai ka FKJGP-West Khasi Hills jong ka samoi treikam 2024-2027, kaba long ha ka sngi Saitjain ha St. Vanni’s Hall ka St. Peters, Pyndengrei, Nongstoin.
Ia kine ki nongkitkam ba thymmai la pynskhem da u President rangbah ka FKJGP Bah Dundee C Khongsit ha ka jingiadon lang u General Secretary Bah Eldie Newton Lyngdoh, u Vice President Bah Kitboklang Nongphlang nalor ki nongialam ka Hynniewtrep National Youth Front (HNYF) bad ka Khasi Students Union (KSU).
Haba ai jingkren, u Bah Dundee ula kyntu ia ki nongkitkam ba thymmai ba ki dei ban don ka jingiatylli para nongialam bad ban tehsong ruh ia ki dkhot khnang ba ka seng kan nang khlain ha ka jingshakri ia ka thain. Ula kyntu ruh ba ha ka treikam, dei ban kynmaw ba ka jingmynjur lang da baroh ki para nongkitkam ka dei kaba kongsan bha ym ban shu rai marwei, kaba lah ban wanrah ia ka jingiapait iapra ha ka seng.
Une u Nongialam ka FKJGP ula ong ba ki dkhot ka FKJGP West Khasi Hills ki dei ban sngew sarong ba kki khla wait ka ri kum u Syiem Tirot Sing bad Wickliff Syiem ki dei kiba ka West Khasi Hills kala pynmih. Namar kata ula ong ba ki nongialam bad ki dkhot ka seng ki dei ban don ka mynsiem shynrang bad ban ieng skhem ha ka nongrim jong ka hok bad ka jingshisha ym ban kynran dien haba iakynduh ia kino kino ki jingeh.
U Bah Dundee ula maham ruh ia ki nongkitkam bad ki dkhot ka seng ba kim dei ban leh ia kino kino ki kam kiba pynjah burom ne pynthohria ia ka seng, ia ki shnong ki thaw bad ka imlang sahlang.
Ki Nongkitkam ba thymmai ka FKJGP-WKH ki kynthup ia u President -Pynshai Kharbani Vice president-Carry Oscar Kharmuti bad bah Serbilin Lyngdoh, General Secretary-Willis Syiem, Assistant GS-Nicky Marweiñ bad bah Jierdstarland Lyngkhoi, Chief Organising secy – Eveningstar Myrthong, bad kiwei kiwei.
Ha kane ka sngi, ka Seng kala pynkup burom ruh ia ki Dkhot kiba ju don bynta ha ki kam noh synniang snam sha ki briew ba pang ba shitom, kiba wan na ki longiing kiba duk. Nalor kata, kala pynkup burom ruh ia ki nongkitkam kiba rim kiba la shongthait noh.
 kala khot la wer ia ki dkhot ka Seng ba kin iatylli kawei bad don ka mynsiem ban shakri hok naduh met bad mynsiem ia ka Jaidbynriew haba buh shadien ia ka jingkwah ban myntoi shimet.){kind=link}