Shillong, Jymmang 01: Ka District Legal Services Authority (DSLA) West Jaintia Hills kaba treikam hapoh ka National Legal Services Authority (NLSA) kala pynlong ka jingialap paidbah halor ka Narcotic Drugs and Psychotropic Substance Act 1985 ha Kiang Nangbah Government College, Multipurpose Hall, Jowai.
Ka jingthmu jong kane ka jingialap paidbah ka dei ban pynsngewthuh iaki nonghikai bad ki samla pule halor ka jingma kaba wan na u drok bad ha ka juh ka por kumno ban ai jinghikai iaki samla pule, kumno ban kiar naka jingshah pynngop bad kumno ban iakhun pyrshah ia u drok.
Naka liang u District bad Sessions Judge -cum- Chairman ka DLSA West Jaintia Hills u NA Khan ula kren halor ka NDPS Act bad ka jingkhaii drok.
Ula ong ba kum kine ki jingialap paidbah kin wanrah ka jingsngewthuh hapdeng ki paidbah, ki nonghikai, ki samla pule bad ki nongiasaid ain naka bynta ban iaid daki ain haba iadei bad ka jingiakhun pyrshah iaka jingkyrni drok.
Ki nongai jinghikai ha kane ka sngi ki kynthup ia u SI. J. K. Majaw, In-charge, Anti Narcotic Task Force (ANTF), West Jaintia Hills District uba la kren halor ka kamram bad ka jingtreikam ki Pulit hapoh ka NDPS, Act, 1985.
Ki nongmihkhmat naka Mihmyntdu Community Social Welfare Association, kata u Bah P Lamare bad ka Kong N Challam kila kren halor ka jingngop ki samla ha u drok.
Hadien ka jingialap paidbah kala don ruh ka jingiakren markhmat hapdeng ki nongkren bad ki paidbah halor ka NDPS.
Ha kane ka sngi la ioh jingkren ruh naka Kong S. Phyllei, Chief Legal Aid Defense Counsel, Dr. JP Sharma, Associate Professor ka Kiang Nangbah Government College.
