Shillong, Nailur 06: U Lat ka Jylla uba dei ruh u Chairman ka State Managing Committee, Satya Pal Malik hynne ka sngi ba-ar ula pynlong ia ka jingiamir jingmut ba nyngkong eh bad ki shipai ka thma bah ba-ar/ki kurim jong ki shipai ba khlad bad ki riewshlur jong ka thma 1962,1965, 1971 bad kiwei kiwei ha ka jingialang ba long ha Raj Bhavan, Shillong.
Ha kane ka jingiakynduh lang la iadon ryngkat u Air Marshall DK Patnaik AVSM, VM, AOC-in-C Eastern Air Command, Lt Gen KC Panchanathan AVSM, GOC 101 Area, bad ki Heh shipai ba dang don ha ka jingshakri bad kiba la shongthait.
Palat 80 ngut ki shipai bala iadon bynta ha ki thma bad ki riewshlur kila wan iashimbynta ha kane ka jingiakynduh bad u Lat ka Jylla.
U Lat Satya Pal Malik ula iaroh ia ka jingaiti bad len lada jong ki shipai bala shongthait kiba dei ki nongiada ia ka jingshngain bad ka burom jong ka Ri bad kiba long ruh kiba kloi ban pha la ka jingim ban iada ia ka jinglaitluid bad ka jingialong kawei jong ka Ri.
