Shillong, Iaiong 25: U Symbud Myntri Rangbah ka Jylla uba khmih ia ka Kam Pohiing u Bah Prestone Tynsong hynne ka sngi Thohdieng, ula ong ba ka sorkar ka iengskhem ban pynthikna ba ki thain khappud kan long kaba shngain pura.
Haba kren halor ka kam thombor kaba la jia dang shen hapoh Pahalgam bad ia ka jingdonkam ban pyrkhing ban tehlakam ia ka jingwan rungtuh shapoh ri, u Bah Prestone Tynsong ula ong, “Ngi lah dep shong jingialang bad ki Border Security Force (BSF) bad baroh ki bor kiba dei khmih, la kadei ka kynhun jong ka jylla ne ka sorkar pdeng. Ngi don ha kajuh ka rukom pyrkhat bad ka rukom iaid, Ngin pynthikna ba ia ka thain khappud bad kawei pat ka ri, kadei ban long kaba shngain pura ban iakhun ia baroh kitei ki jingeh ha kano kano ka dur ruh, ne kano kano ka jingwan rungtuh ha kano kano ka rukom, ngi lah dep ban iakren bad ngi lah treikam pura ha kaba iadei bad ki thain khappud”.
“Ym tang katei, ngi lah dep iatreilang ryngkat bad ki bor shnong ne ki VDP kynthup ia ki BSF, Pulit bad kiwei kiwei ki kynhun jong ka sorkar pdeng, kat kaba ngi lah, ngin pynthikna ba kam dei ban don kano kano ka jingwan rungtuh” ula bynrap.
U Symbud Myntri Rangbah ka jylla ula kdew ruh halor ki khubor kiba la mih bad ong ba kila don ka jingkem ia ki katto katne kiba la wan rungtuh, la pynngat bad la set ia ki ha along katkum ki kyndon jong ka Foreigners’ Act.
Ha kaba iadei bad ka jingshah kem uwei u samla na Umlyngka halor ka jingthoh ha ka social media da kaba ai jingkyrshan ia ki lehnoh kiba la thombor ha Pahalgam, u Bah Prestone Tynsong ula ong, “Ki pulit kila shimkhia mardor namar ba ngi sngewkhia bha ia ka jingthoh jong une u khynnah kaba long pyrshah ia ka ri(anti-national). Kan ktah ym tang ia ka jylla Meghalaya hynrei kan ktah ruh ia ka ri baroh kawei bad kan long ruh kum ka jingpynshlur ban leh ia ki kam be-ain kaban lam sha ka jingbuh jingma ia ka shongshngain jong ki nongshong shnong ka jylla bad ia ki nongshong shnong ha ka ri baroh kawei. Kumta ngi lah shimkhia thikna ia kane ka mat bad kumta la shim mardor ia ki sienjam halor kane”.
“Nga kyrpad ia baroh ki nongshong shnong jong ka jylla bad ha ka ri baroh kawei, to ngin ia ieng tylli lang kawei bad ba ngin ym ailad ia kino kino ki kam ialeh pyrshah ia ka ri ban jia biang ha kane ka ri baroh kawei” la kyntu u Symbud Myntri Rangbah.
U Simon Shylla 30 snem ka rta, ula shah kem na ka iingsah ka jongu kaba don ha Umlyngka.
Ki pulit kila ioh kurup noh ia ki 2 tylli ki mobile phone bad la rejistar case ia u hapoh jong ka Lumdiengjri PS bad la pynngat ia u ha ka Case No 421(04)2025 hapoh ki kyndon jong ka 113(3)/196(1)(a)/147 BNS.
Kane ka jingkem ki pulit, kadei hadien ba la ioh jingtip na kiba bun balang, ba uwei u ‘Man Shylla’ ula kynthoh pyrshah ia ka ri, ha ka video kaba la pynmih da ka Northeast Live News ha kaba iadei bad ka jingthombor ki lehnoh ha Pahalgam ha kaba ula kyrshan ia ki lehnoh ha ka jingpyniap ka jongki bad ula kyntu ia ki lehnoh ban leh ia kum katei ka kam thombor ia kawei ka jaidbynriew ha ka thain shatei lam mihngi lyngba ka Facebook ka jongu kaba ula ai kyrteng “Man Shylla” kaba buh ha ka jingma ia ka jingiatylli bad ia ka jinglong ka ri.
