Shillong, Nailur 13 : U Myntri Rangbah ka Assam Himanta Biswa Sarma bad Myntri Rangbah ka Meghalaya Conrad K Sangma, ha ka sngi Balang, kila iashong iakren kam para maki halor ka kam khappud bad rai ban iathaw ia ki lad ki lynti ki ban wanrah ia ka jingshaniah u paidbah hashuwa ban iahiar jurip lang sha ki jaka iakajia ha u bnai Risaw.
Haba iakrren bad ki nongthoh khubor, u Himanta ula ong “Ngi kwah ban da iashong jingialang ba thikna bad ngin sa lah ban shim ia ki katto katne ki sienjam ki ban wanrah ia ka jingshaniah u paidbah bad da kane, ngin sa iahiar jurip lang sha khappud”.
“Namar ngi don ia ka jingpyrkhat ba ka jingleit jurip jong ngi kam dei ban pynmih ia kino kino ki jingiakynad namar lada baroh arngut ki Myntri Rangbah ki leit sha kitei ki jaka hynrei hadien ba ki wan phai pat kan mih biang ka jingiakynad bad ki paidbah kin kynnoh ia ngi. Namar kata, ngi kwah ban shim ia ki lad ki lynti ki ban wanrah shwa ia ka jingshaniah u paidbah” ula bynrap.
U Himanta ula ong “Shisien ba ngi la lah ban thaw ia kine ki lad ki lynti, ngi baroh arngut ngin sa leit sha kitei ki jaka bad ngin sa iakren bad ki paidbah jong ki shnong khappud ruh. Ha ka por ba ngi leit sha Langpih, kila don ki jingleh kmen bad ngi kwah ba haba ngi leit sha Karbi Anglong bad Jaintia Hills ruh kan don kum kane kajuh ka jinglehkmen”.
U Myntri Rangbah ka Jylla ula pynpaw ba u kwah ban da iashong jingialang shuwa bad sa leit iuhkjat sha khappud ha u bnai Risaw.
“Nga wah ban leh ha u bnai Risaw. Lada u Myntri Rangbah ka Meghalaya um lah ban wan sha Guwahati ha ka taiew ba nyngkong u Risaw, ngi lah ban leh ha ka taiew ba-ar ruh jong u Risaw” ula ong.
Haba kylli lano ba ki Regional Committee kin aiti ia ki kaiphod, u Sarma ula ong “Kumba ngi la iathuh iaphi ba kine ki hynriew tylli ki jaka ki dei kiba kham jynjar ban pynbeit, kumta ia kine ki Regional Committee la khlieh da ki briew kiba la rangbah na baroh arliang, kila iatrei shitom, kila leit jurip ia kitei ki jaka bad ngi ngeit ba ia baroh kiei kiei yn sa lah ban iapynbeit ha ka lynti kaba jai jai bad ba iasngewthuh jingmut.
Haba kyntu ia ki paidbah ha Khappud ban ia pynneh ia ka jingiashongsuk shongsain, u Sarma ula kular ba ki artylli ki Sorkar Jylla kila pyrshang katba lah ban pynbeit noh ia ki jingiakajia kat kum ka jinghun jong u paidbah na baroh arliang-ka Assam bad Meghalaya.
“Ki (paidbah ha khappud) dei ban kynmaw ba ngi la trei khlem shongthait ha kaban pynbeit ia ka jingiakajia. Ngi kwah ban buh ha ka jingmut jingpyrkhat jong ngi ia ka bha ka miat jong ki paidbah b aim ha baroh arliang ki khappud. Ngi kwah ban iada ia ka bha ka miat ki paidbah bas ah ha khappud. Kumta, long kiba jai jai, ia im suk, iarap ia ngi, ngin ia pyrshang ban pynbeit noh ia ka jingiakajia pud kat kum ka jingiahunlang jong ki briew na Assam bad Meghalaya”.
Shuwa kane, u Myntri Rangbah ka Meghalaya Conrad K Sangma ula ong ba kane ka jingiakynduh ka dei shibynta na ka kam ban iakren ia kane kine kiei kiei khnang ba kan iarap ia baroh artylli ki Jylla ba kin sngewthuh kham bha.
“Kam don satia kano kano ka jingmih na kane ka jingiakynduh bad kane ka jingiakynduh kan dang iai bteng na ka por sha ka por” ula ong haba ai khublei ia u Myntri Rangbah ka Assam, u CEM ka KAAC bad u Symbud Myntri Rangbah ka Jylla, uba khlieh ia ka Regional Committee ka Jaintia Hills.
