Shillong, Nailur 13: U Myntri Rangbah barim ka jylla bah D.D Lapang u ba dei ruh u nongaibuit ka sorkar jylla hynne ka sngi ula kam baka jinglong jingman ka shong suk shong shngain hapoh ka jylla kala kham bha mynta ka kynti haba ia nujor ha ki snem bala dep.
“Kam da don shuh ka jingshong syier lane ka jingshah pynthut iaka shong suk shong shngain kumba ka jylla ka mad ha ki snem bala dep, ha kaba ka jylla kala sakhi ka jingshah pyniap briew. Baroh kine ki jingjia kila sdang jah lut” la ong u myntri rangbah barim ka jylla u bah D.D Lapang haba jubab iaka jingkylli halor ka jinglah ka sorkar MDA 2.0 ba ialam daka NPP ban wanrah ka shong suk shong shngain.
Haba kylli halor ka jingiakajia ha ki thain khappud, u bah DD Lapang ula ong ba ka jingpynbeit ia u pud u sam kadei lyngba ka jingiakren sngewthuh jingmut jong baroh artylli ki jylla bad ula kyntu iaki artylli ki sorkar jylla ban aiti met bad mynsiem ban wanrah noh ka jingpynbeit iala u pud u sam ka jylla Meghalaya bad Assam.
Hynrei haba kylli halor ka jinglah treikam ka sorkar MDA 2.0 ba ialam da u myntri rangbah ka jylla u Conrad K. Sangma, u bah DD Lapang ula ai jingmut iaka sorkar ban sdang iaki kam naduh ki shnong ki thaw kum ka nuksa ban kyntiew iaka kam rep ka riang ha baroh kawei ka jylla.
U myntri rangbah barim ka jylla ula iaroh iaka NPP kum ka sengsain pyrthei ka ban rah iaki mat jong ka thain shathei lammihngi (North East) bad ula ong ba namar ki mat ba ktah iaka bha ka miat ki paidbah bad ka thain baroh kawei kala pyn long iaki myntri sorkar pdeng ban kyntiew iaki thain kyndong bad ki shnong.
