Shillong, K’lyngkot 29 : U Myntri Rangbah ka Jylla Conrad K Sangma ha ka sngi Palei, ula iakynduh ia u Myntri Rangbah Duh ka Ri Narendra Modi bad iakren halor ki lynti iaid ka roi ka par jong ka Jylla bad pan ia ka jingkyrshan ba khlem sangeh na ka Sorkar Pdeng.
“Na ka bynta ki paidbah ka Meghalaya, nga pynpaw ia ka jingsngewnguh naduh mynsiem ia ki jing kitbok kitrwiang jong u ha ka sngi ba ka Jylla Meghalaya ka ioh iala ka Jylla “Meghalaya Statehood Day” ong u Conrad haba ai khubleiia u Myntri Rangbah Duh namar ka jingithuh ia ki jingtei ba phylla bad ba im jong u menbarim, kynthup ki Jingkieng Diengjri.
Ha ka jingialang, u Myntri Rangbah ula batai bniah ia u Myntri Rangbah Duh halor ki jingiaid shaphrang ka roi ka par jong ka Jylla ha kine ki khyndiat snem bala leit.
U la pynpaw ia ka jingtreikam kaba khlain jong ka Meghalaya ban kyntiew ia ka ioh ka kot, ka jingpyn janai ha ka koit ka khiah ki Kmie ba kha khun bad ka jingdon ki nongshongshnong kiba lah ban tei ia ka Jylla, ka jingpynkhlain ia ki Processing Unit kiba heh bad pyniasoh sha ki iew ban kyntiew arshah ia ka kamai kajih ki nongrep, ka jingiaid shakhmat ki kam pynroi jong ka New Shillong City, ka jingpynroi ia ka kam jngohkai lyngba ki riew shimet bad ka jingiashimbynta lang ki paidbah, ka jingpyn kheh ban pynlong ia ka 39th National Games ha u 2027, bad ki jingpyrshang ba khlem sangeh ha kaba pynneh pynsah bad kyntiew ia ki rukom tip tynrai bad ki pateng tynrai.
U Myntri Rangbah bad u Myntri Rangbah Duh kila iakren ruh halor ki buit treikam kiba iadei bad ka bad ka jingroi bad jingkiew jong ka Jylla ha ki snem ban wan.
Ki bynta ba kongsan jong ka jingiakren ki kynthup ia ka jingpynneh ia ka jingkiew jong ki Jylla NER kiba kham rit, ka jingbteng ka jingkyrshan ka Sorkar pdeng ha ka jingbei tyngka, ka jingpynkiew ia ka EAP ceiling na ka bynta ka Jylla, ka jingpynroi ia ki jingtei, ka jingpynkupbor ha ka pla tyngka, bad ki jingpyntreikam ia ki prokram ba bun snem kiba thmu ban pynkhlain ia ki nongrim ka Jylla ban kyntiew ia ka ioh ka kot.
U Myntri Rangbah ula aiti ruh ia ka thup ki kot ki sla sha u Myntri Rangbah Duh kiba batai ia ka jingkiew shaphrang ka Jylla, ka thong jong ki snem ban wan, bad ka mat ba kham kongsan ka dei ka jingpan ia ka jingkyrshan ba khlem sangeh na ka Sorkar India.
Kine ki kynthup ia ki jingthoh halor ka jingkiew shaphrang ka Jylla Meghalaya ha ka roi ka par, ka Vission 2032 bad ka jingtyrwa ban pynneh ia ka lynti iaid jong ka Jylla haba phai sha ka roi ka par kaba iaid ryngkat ryngkat bad ka thong jong ka Ri jong ka Viksit Bharat.
