Tura, Nailar 29 : U Myntri Rangbah ka Jylla Conrad K Sangma ha ka sngi Thohdieng, ula iakynduh ia ki Nokma kiba mihkhmat na kylleng ka ri-lum Garo bala ialam da u President ka GSU Tengsak Momin.
Haba kren ha ka jingialang, u Conrad ula pynpaw ia ka jingsngewnguh ia baroh ki nongialam bad ki sengbhalang kiba la wan iashimbynta ha ka jingialang ban iakren halor ki mat bapher bapher khamtam ki jinglong jingman kiba long mynta ha GHADC.
Ula ong ba ka GHADC ka don hapdeng ka jingbym shngain ha ka liang ka pla tyngka bad lada ym lah ban leh eiei, ka lah ban lam sha ki jingeh kiba khraw ia kane ka council.
“Ka jinglum khajna ne pynmih pisa jong ka GHADC mynta u snem ka long tang kumba T.25 klur katba ka jingpynlut na ka bynta ki nongtrei ka kot T.70 klur, kaba la iapher bak ly bak ha ka jingpynmih pisa bad jingpynlut pisa bad ha kum kane ka khep, ka Sorkar kala wan shakhmat ban tuklar tang ban wanrah ia ka jingpynkylla ha ka rukom pyniaid ia ka pisa tyngka bad ka jingshngain ka pla tyngka ha GHADC” ula ong.
Ula ban jur ba ka Sorkar Jylla kam don bor ne u pud halor ka jingtreikam jong ka GHADC. “Ka jingtyrwa jong ngi ka long tang ban siew ia ka tulop jong ki nongtrei ka GHADC naduh ka 1 tarik Naiwieng 2025 kum ka lad ban pyllait ia ka GHADC na ka jingeh bad kan long na ka bynta ka bha ka miat ki nongtrei bad ruh kum shibynta ban wanrah ia ka jingkylla ha ka Council” ula ong.
Ula ai ruh ia ka jingbatai kaba bniah halor ki jingpynkylla ki ban shim ba kynthup ia ka jingdon noh ka Service Rules jong ki Council, ka policy ban thied jingthied (procurement), ban buh ia ki nongtrei kat kum ka jingdon ka kam bad kiwei kiwei.
