Shillong, Jylliew 25: U Myntri Rangbah ka Jylla Conrad K Sangma, ula iakynduh ia bun ngut ki Myntri ka Sorkar Pdeng ha New Delhi ha ka sngi Nyngkong bad pan ia ki jingiarap bad jingkyrshan ban kyntiew ia ka roi ka par jong ka Jylla.
U Myntri Rangbah ula iashong jingialang bad ki Myntri bapher bapher ban kyntiew ia ka skill development, ka jingkyntiew ia ki kam seng karkhana, ki jingtei bapher bapher, ka pule dangle bad ka technology.
U Conrad ula iakynduh nyngkong eh ia u Myntri Khynnah ka Skill Development and Entrepreneurship Jayant Choudhury bad batai ha u ia ki plan ba thrang eh jong ka Sorkar ban wanrah ia ka Skill Park ha Shillong bad Tura.
Haba pyntip iakane lyngba ka X, u Conrad ula ong “Nga ioh ban iakynduh ia u MoS Jayant Choudhury ban iakren halor ka plan ba thrang eh ka Sorkar ban sdang ia ka skill park ha Shillong bad Tura,ka ban ai ia ki jinghikai pyntit iaki sap jong ki samla khnang ba kin lah ban iohkam iohjam”.
Hadien kane, ula iakynduh ia u Myntri ka Tnad Commerce & Industries Piyush Goel bad pan ia ka jingpyrshan ban nang pynkhlain ia ka jingnang roi ki karkhana hapoh Meghalaya.
Nangne, u Conrad ula shong jingialang ruh bad ka Myntri pla tyngka Nirmala Sitharaman bad pyntip sha a halor ki project ka Sorkar pdeng ba dang iaid ha Jylla. Ula pan ruh ia ka jingkyrshan ban bei pisa sha ka Meghalaya Economic Growth Accelerator (MEGA) corridor project ha kane ka Finance Commission ba mynta.
U Conrad ula leit iakynduh ruh ia u Myntri ka Development of North Eastern Region (DoNER) Jyotradhitya M Scindia bad pan ia ka jingkyrshan pisa na ka bynta ki projeck kam pynroi ha Jylla. Ulakyrpad ia u Scindia ban mynjur ha kaban nang pynbun ia ka jingai song pisa lyngba ka DoNER ia ka Jylla.
U Conrad ula iakynduh ruh ia u Myntri ka Pule Dangle Dharmendra Pradhan bad pyntip ha u ia ka jingiaid ki project kam pule puthi ha Meghalaya bad kyrpad ia u Myntri ba un nang bteng ban ai ka jingkyrshan.
Khatduh u Conrad ula iakynduh ia u Myntri ka Information Technology, Ashiwini Vaishnam bad pyntip ha u ia ki project kiba thmu ban pyntrei ha Meghalaya ban pynkhlain ia ka synshar khadar lyngba ki jingkhein jingdiah.
Kine ki jingleit iakynduh ia ki Myntri ka Sorkar Pdeng ka long shibynta na ka jingpyrshang jong ka Sorkar MDA ba ialam da ka NPP ban pyntyllun sted ia ki kam pynroi hapoh ka Jylla da ka jingkyrshan ka Sorkar Pdeng.
