Shillong, Nailar 18 : U President ka Congress bad MP barim ka Shillong Bah Vincent H Pala, ula iakynduh ia u Myntri Rangbah ka Jylla Conrad K Sangma, bad kyrpad ban kyntiew kyrdan kyrkieh noh ia ki surok DSSH sha ki National Highway.
Ki surok DSSH ki shakri kum u thiedsnam ba kongsan bha ha ka ioh ka kot, kaba kit kumba 80% u dewiong na Ri-lum Jaintia bad ba pyniasoh ia ki jaka ba riewspah bha ha ka jingdon ki marpoh khyndew kum ka Sutnga, Sumer, Saipung bad Nongkhlieh.
Watla ka bynta jong ka ban pynsuk ia ka khaii ka pateng bad pynmih khajna ia ka JHADC bad ka Jylla, kane ka surok kala shu shah ieh khongreng la slem bha bad dang sah ha ka jinglong ba jot rathai bha.
Ha ka shithi, u bah Pala ula pynkynmaw ba katba ka Ministry pf Road Transport & Highway (MoRTH) kham mynshuwa kala dep ai jingmynjur ia ka jingtyrwa ban kyntiew kyrdan, hynrei ka jingpyntreikam ka dei kaba dang ban sdang.
Ula pynpaw ruh ia ka jingdonkam ba ka Sorkar Jylla ban kynthup noh ia kane ka surok hapoh ka skhim World Bank hynrei ula ban jur ia ka jingdonkam ban leh eiei noh mardor haba khmih ia ka jing sniew bad jingjot rathai jong ka surok bad ka jingmad jingeh ki nongshongshnong ka thain ha ka leit ka wan ba manla ka sngi.
U Myntri Rangbah ula kular ia u Bah Pala ba ka Sorkar Jylla kan sa shim ia ki sienjam kiba donkam ban leh eiei kham kloi noh ia kane ka kam.
Hadien ka jingialang, u Bah Pala ula ong “Kane ka surok kam dei tang halor ka jingpyniasoh, ka dei ruh halor kaba ai kamai jakpoh, ka khaii ka pateng bad ka bha ka miat jong ki hajar hajar ngut ki briew. Ka jingpynslem ha kaban kyntiew kyrdan kala ktah jur bha. Nga pdiang sngewbha ia ka jingkular u Myntri Rangbah bad ngan dang iai bteng ban buddien ia kane ka kam tad haduh ba ki paidbah kin ioh ia ka jingtei kaba ki dei hok ban ioh”.
