Shillong, Naiwieng 01: Ki shipai Border Security Force (BSF) jong ka ri India bad ki shipai Border Guard Bangladesh (BGB) jong ka ri Bangladesh, hynne ka sngi ba-ar kila ia shong jingialang ha Kilapara Border Out Post, kaba hap ha West Garo Hills.
Ia ka kynhun jong ki shipai BSF la ialam da u Harmeet Singh, DIG, Sector HQ BSF,Tura katba ia ka kynhun jong ki shipai BGB la ialam da u Md. Mahmudur Rahman uba long u Deputy Director General, Sector Commander BGB, Mymensingh, Bangladesh.
Hashwa ban sdang ka jingialang, kitei ki heh shipai na ki ar tylli ki ri kila leit ban iashim bynta ha kaban buh syntiew ha u War Memorial, Kilapara uba dei u mot sahnam jong ki shipai kiba len iala ka jingim.
Ki heh shipai ka BSF bad BGB kila iatai sani halor kiba bun ki mat kiba iadei bad ka thaiñ khappud naduh ki kam be-aiñ, ka jingtih be-aiñ ia u shyiap, ka jingkhaii tuh ia ki masi bad kiwei kiwei.
Kila shim ruh iaka rai ba kine baroh ar ki kynhun shipai kin ai ka jingiatreilang bad ban don iaka jingiadei kaba jan ban pynneh iaka shongsuk shongshngaiñ ha ka thaiñ khappud.
