Nongpoh, Iaiong 09 : Ki seng jong ki kali kamai Tourist ka Meghalaya bad Assam, kila iakynduh kyrkieh hyne ka sngi Balang ha Nongpoh, ban iakren iapynbeit halor ka huri hura kaba la ktah ia ka kamai kajih ki kali Tourist na baroh ar Jylla hadien ka jingshah shoh uwei u draibar Khasi ha Khanapara.
Kane ka jingshah shoh u draibar Khasi kala jia ha ka 7 tarik Iaiong bad la tip kyrteng ia u da u Iajerlang Mylliem Umlong, uba dei ruh u dkhot ka All Khasi Meghalaya Tourist & Taxi Association.
Kane ka jingjia kala pynmih ia ka huri hura haduh u pud ba poi sha ka jingkhang syndon ia ki kali Tourist na Assam ba kin iakit briew na ki jaka pynieng kali ha Jylla Meghalaya-kaba la treikam lang ruh kumjuh ha Assam.
Ka seng All Khasi Meghalaya Tourist & Taxi Association lem bad ka All India Goods Transport Workers Association na Assam, kila iakynduh kyrkieh ha Nongpoh ban tem noh ia kane ka huri hura.
U General Secretary ka All India Goods Transport Workers Federation, Assam State, Biren Sharma haba kren sha ki nong thoh khubor, ula pynpaw ia ka jingdonkam ban don ka jingiakren pynbeit haba don kano kano ka jingjia ne ka huri hura ym ban pyni daka bor haba kdew “Mynta ka sngi ngi la lah ban iapynbeit ia ka jingshah shoh u draibar Khasi ha Khanapara tang da ka jingiakren”.
Ula ong ba ka jingiapynbeit ka long kaba donkam bha na baroh arliang khnang ba kan ym ktah ia ka kamai ka kajih jong ki nongkamai na baroh ar Jylla.
Katba u President ka All Khasi Meghalaya Tourist & Taxi Association Bah Ricaldinus Dohling ula iathuh ba ka seng kala pyr shang ban tuklar ia kane ka jingshah jrong kti u dkhot da kaba pyrshang ban iakren bad ki seng ki nongkamai kali na Khanapara hynrei u president kane ka seng um shym la wan mih satia bad dei na kane ka daw ba la pynbor ia ka kynhun na Meghalaya ban khang kamai ia ki kali Assam na ki stand ha Meghalaya.
U Secretary ka Iaitylli Tourist Owners & Drivers Association samla Balajied Jyrwa u iathuh ba kum kine ki jingjia ki ju jia na ka por sha ka por bad ha kane ka jingialang la iarai ban thaw noh da ka Committee ka ban tehlakam ia kum kine ki jingjia ha kisngi ban dang wan.
U iathuh ba ha kane ka Committee, ki kynhun niah kali na Meghalaya bad Assam kin iadonlang ha ka Committee kum ki dkhot.
