Shillong, K’Lyngkot 29: Ki nongshet Mid Day Meal haki skul lane ki Cook cum Helpers napoh ka Jylla, kila pyntip ba kila dep ban kynduh ia u Secretary ka tnat Ministry of Education ka Sorkar Pdeng ban dawa kyntiew iaka bai nong jong ki shaka T.5000 man u bnai.
Haba pynbna ia kane, ka President jong ka Cook cum Helpers Kong Banalist Syiem kala iathuh ba ka kynhun kaila kynduh ia u Secretary ka tnat Ministry of Education ka Sorkar Pdeng haka 23 tarik mynta u bnai.
Kala iathuh ba ki don kumba 20 hajar ngut ki nongtrei ba shet ja ha ki skul ha baroh kawei ka Jylla bad ki ioh ka bai nong tang T.1100 naka Sorkar Jylla bad T. 900 naka Sorkar Pdeng.
“Haka 23 tarik K’lyngkot, ngi la iakynduh ia u Secretary ka tnat Ministry of Education ka Sorkar Pdeng ha Nongbah Delhi ban dawa kyntiew noh iaka bai nong naka bhah ka Sorkar Pdeng ka ban kot shaka T. 5000 lada kynthup lang ka bhah ban ioh naka Sorkar Jylla” ong ka Kong Banalist.
Ka Kong Banalist kala iathuh ba kane ka jingdawa ban kyntiew iaka bai nong kadei ruh ka jingdawa jong baroh ki nongshet ja skul jong ka thain shathei lammihngi (North East) baroh kawei.
Kala pyntip ruh ba ki nongshet ja kila kyntu ia u Myntri Rangbah ka Jylla Assam u Himanta Biswa Sarma uba dei u nongialam ka thain shathei lammihngi (North East) ban iakren lem bad u Myntri Rangbahduh ka India u Narendra Modi halor kane ka jingdawa.
Haba kylli ka Kong Banalist kala ong “Naka liang u Secretary ka tnat Ministry of Education ka Sorkar Pdeng ula kular ban shimkhia ia kane ban iakren bad ka Sorkar Pdeng”.
