Shillong, Naiwieng 08: U D. Dharma Rao uba long u National Consultant jong ka Pradhan Mantri TB Mukt Bharat Abhiyaan (PMTBMBA) ha ka Central TB Division (CTD) hapoh jongka Ministry of Health & Family Welfare, hynne ka sngi Balang ula leit iakynduh ia u Lat ka jylla u Phagu Chauhan ha Raj Bhavan.
Ha katei ka jingialang u D Dharma Rao bad ki heh ophisar jong ka Meghalaya State TB Cell, kiba kynthup ia Dr. Moami Marak, SM&HO, Dr Amica Rynjah, APO bad Barnali, kila ai ka jingbatai kaba bniah ia u Lat ka jylla ha kaba iadei bad ka jingpyntreikam ia ka PMTBMBA ha Meghalaya.
U Lat ka jylla uba long u nongnoh synniang ne Donor/Ni-kshay Mitra ha kaban ai jingkyrshan ia ki nongpang TB ha ka jylla, ula iaroh iaka jingnoh synniang jong ki 132 ngut kibakynthup ia ki riewshimet, ki nongmihkhmat paidbah, ki sengbhalang, ki kynhun niam, ki Corporation, Cooperative bad ki ophisar jong ki tnad sorkar kiba la mih shakhmat ban ai jingkyrshan ia ki 1,177 ngut ki nongpang TB ha Meghalaya.
La pyntip ia u Lat ba ia mynta ki don 2,937 ki nongpang TB kiba dang don hapdeng ka jingioh jingsumar ha kylleng ki bynta jongka jylla bad u Lat ula pynpaw ia ka jingsngewtynnad ba ka Meghalaya kam da don bun than ki nongpang TB bad u kyrmen skhem ba lyngba ka jingtrei shitom yn lah ban pynurlong 100 na ka 100 ia ka jingai jingkyrshan ban pynbiang ia ki marbam mardih ia ki nongpang
TB ha ka jylla.
Lyngba katei ka jingialang, u Lat ula kyntu ruh ia ki paidbah ba kin mih shakhmat ban noh synniang naka bynta ban ai jingkyrshan ia ki nongpang TB ha ka jylla.
La banjur ba lyngba ka Ni-kshay Mitra kan pynshlur ia imlang sahlang ba kan iashimbynta shitrhem ha kaban iakhun pyrshah iaka jingpang TB bad la pynshai ruh ba ka jinglah ban pynbiang ia ki marbam mardih kiba bha bad kiba tei ia ki nongpang TB kan iarap shibun ba kin ioh ia ka jingsumar kaba bha bad kan iarap ruh ha kaban pynduna iaka jingkhohnioh bad ka jingniew beiñ ia kiba don iaka TB.
Ka Ni-kshay Mitra kadei ka ‘online platform’ ha kaba ki riewshimet kiba dei ki nongnoh synniang (donor) ki lah ban rejistar bad ban shim ia ka smai ban ai jingiarap da ki marbam mardih ia ki nongpang TB bad naka bynta ki jingtip kiba bniah lah ban ioh ia ki jingtip kiba pura na ka State TB Cell, Shillong Meghalaya.
Da ka jingiatreilang ngi lah ban rat dyngkhong ia ka jingpang TB. To ngin ia bamsmai ban pynlong ia ka Meghalaya kaba laitluid naka jingpan TB.
Pule lang ia kane: “Hap leh tyngeh ka Sorkar ia ka Dhar Kompani lada pynshisha ba shna torti ia ka surok NH-206” : Hek
Peit lang ia kane
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai
