Shillong, Naitung 12 : Ka Myntri Pla Tyngka bad Corporate Affairs ka Ri Nirmala Sitharaman, kala iakynduh ia ki kynhun bapher bapher ha Shillong ha ka sngi Saitjain bad kala iamir jingmut markhmat bad ki nongkhaii, ki nongsengkam, ki nongmihkhmat na ki karkhana bad ki nongshongshnong.
Ia kane ka jingialang la pynlong da ka Sorkar Meghalaya ha ryngkat ka jingiatreilang bad ka Department of Financial Services (DES), ka Central Board of Indirect Taxes & Custom (CBIC) bad ka Central Board of Direct Taxes (CBDT).
Ha kane ka jingialang la wan ban iashimbynta ruh u Chairman ka SBIC Shanjay Kumar Agarwal, dkhot ka CBIC Mohan Kumar Singh bad ki Heh Ophisar na ka Ministry of Finance, ka Sorkar Meghalaya bad ki tnad bapher bapher.
Kum ka jingai jingithuh ba don burom, ka Sitharaman kala pynkup burom ruh ia ka Longkmie Rimiful Shylla bad Wanjoplin, kiba dei napdeng ki Kynthei ka Jylla Meghalaya kiba siew bun eh ka khajna, namar ka jing synniang jong ki sha ka jinglum khajna ka Ri.
Ha ka jingiakren, ki nongshim bynta ki la pynsngew ia shibun ki jingsngew bad ki jingai jingmut bapher bapher. Ki mat ba kongsan ki kynthup ia ka jingdonkam ban pynthikna ia ka rukom treikam kaba iadei bad ka roi ka par kaba pynneh ia ka mariang, ka jingdonkam ban kyntiew ia ka jingwad bniah bad jingpynroi bad ka jingiarap pisa na ka bynta ki jaka treikam kiba don bynta ha ka R&D, bad ka jingpyrkhat kaba kham bun ia ka polisi ha ka hospitality sector ne ki kam ban pynbit pynbiang ia ki jingdonkam ki nongwankai ha Jylla.
Ki nongiashim bynta ki la pynpaw ruh ia ka jingdonkam ban wanrah ia ki karkhana trai ri hapoh ka Targeted Champion Sector Scheme, ban pyniar ia ka lad ban ioh ram bad ki iew kiba kham bha na ka bynta ki startup bad ki MSME, khamtam kito kiba don tynrai ha ka thain shatei lammihngi, bad ban kyntiew ia ki jingbei tyngka ka Sorkar Pdeng ban pynbun ia ki jingtei ki ban kyntiew ia ka thain.
La pynpaw ruh ïa ki jingsngewkhia halor ka jinglut jingsep kaba heh ha ka liang ka jingpynpoi mar namar ki jingeh ha ka jaka jong ka thaiñ, kaba dawa ban ai noh da ka subsidy ha ka leit ka wan bad kiwei kiwei.
Ka Sitharaman kala pdiang ia kine ki jingai jingmut bad ka la pynskhem biang ïa ka jingkular jong ka Sorkar Pdeng ban kdup lang ia baroh.
